Футбол бўйича Қозоғистон миллий терма жамоаси Руминияга қарши ЖЧ—2018 саралаш учрашувига «Ўзбекистон ҳаво йўллари» миллий авиакомпанияси самолётида парвоз қилди. Бу ҳақда Tengrinews хабар бермоқда.
Бу ҳолат ижтимоий тармоқларнинг Қозоғистон сегментида турли ҳазиломуз фикрларга сабаб бўлди. Хусусан, фойдаланувчилардан бири: «Бизнинг термамиз ўйин олдидан руминларни қўрқитиш учун нисбатан кучлироқ рақиб номи билан ниқобланди!», — деб ёзган.
Қозоғистон миллий терма жамоаси матбуот котиби Ербол Каиров манзилга Ўзбекистон самолётида етиб олиш ҳолатига ҳаддан зиёд эътибор қаратиб юбориш ўринли эмаслигини таъкидлади.
«Қозоғистон авиакомпаниялари узоқ масофаларга чартер рейсларни амалга оширмаслигини кўпчилик яхши билади. Бу ҳаддан зиёд эътибор қаратишга арзигулик ҳолат эмас, деб ўйлайман. Бутун дунёда шундай амалиёт бор», — деди Каиров.
«Нима бўлганда, бизни Руминия ва Арманистонга қарши жуда муҳим учрашувлар кутиб турибди. Шу боис, барча ишқибозларни миллий терма жамоа атрофида бирлашишга чақириб қоламан», — деди Қозоғистон термаси матбуот котиби.
Руминия ва Қозоғистон терма жамоалари ўртасидаги ЖЧ—2018 саралаш учрашуви 5 октябрь Руминиянинг Плоешти шаҳрида бўлиб ўтади. Қозоғистон термаси мундиалга чиқиш имкониятларини тўла бой бериб бўлган.
Маълумот учун, футбол бўйича Ўзбекистон миллий терма жамоаси ФИФА рейтингида айни вақтда 69-ўринда, Қозоғистон эса 126-ўринда бормоқда.
Изоҳ (0)