Futbol bo‘yicha Qozog‘iston milliy terma jamoasi Ruminiyaga qarshi JCh—2018 saralash uchrashuviga “O‘zbekiston havo yo‘llari” milliy aviakompaniyasi samolyotida parvoz qildi. Bu haqda Tengrinews xabar bermoqda.
Bu holat ijtimoiy tarmoqlarning Qozog‘iston segmentida turli hazilomuz fikrlarga sabab bo‘ldi. Xususan, foydalanuvchilardan biri: “Bizning termamiz o‘yin oldidan ruminlarni qo‘rqitish uchun nisbatan kuchliroq raqib nomi bilan niqoblandi!”, — deb yozgan.
Qozog‘iston milliy terma jamoasi matbuot kotibi Yerbol Kairov manzilga O‘zbekiston samolyotida yetib olish holatiga haddan ziyod e’tibor qaratib yuborish o‘rinli emasligini ta’kidladi.
“Qozog‘iston aviakompaniyalari uzoq masofalarga charter reyslarni amalga oshirmasligini ko‘pchilik yaxshi biladi. Bu haddan ziyod e’tibor qaratishga arzigulik holat emas, deb o‘ylayman. Butun dunyoda shunday amaliyot bor”, — dedi Kairov.
“Nima bo‘lganda, bizni Ruminiya va Armanistonga qarshi juda muhim uchrashuvlar kutib turibdi. Shu bois, barcha ishqibozlarni milliy terma jamoa atrofida birlashishga chaqirib qolaman”, — dedi Qozog‘iston termasi matbuot kotibi.
Ruminiya va Qozog‘iston terma jamoalari o‘rtasidagi JCh—2018 saralash uchrashuvi 5-oktabr Ruminiyaning Ployeshti shahrida bo‘lib o‘tadi. Qozog‘iston termasi mundialga chiqish imkoniyatlarini to‘la boy berib bo‘lgan.
Ma’lumot uchun, futbol bo‘yicha O‘zbekiston milliy terma jamoasi FIFA reytingida ayni vaqtda 69-o‘rinda, Qozog‘iston esa 126-o‘rinda bormoqda.
Izoh (0)