Тошкент шаҳрини қуриш бўйича бош режани ишлаб чиқишда даниялик таниқли архитектор Ян Гейлнинг тавсияларидан фойдаланиш режалаштирилмоқда. Бу ҳақда Тошкент шаҳар ҳокимлигида 3 октябрь куни бўлиб ўтган матбуот анжуманида шаҳар архитектура ва қурилиш бош бошқармаси бошлиғи ўринбосари Асомиддин Тожиев маълум қилди.
«Тошкент шаҳри қурилишининг бош режасини ишлаб чиқишга расмий равишда таниқли архитектор Ян Гейлни жалб этишни режалаштирмоқдамиз. Гейлнинг кун тартиби ўта тиғиз бўлгани учун таклиф қилганимиздан сўнг унга аниқ таклиф беришимиз керак. Унинг қачон Ўзбекистонга келиши бизнинг музокараларимиздан сўнг аниқ бўлади. Янги қурилишларни лойиҳалаштиришга нафақат Ян Гейл, балки бир неча хорижий мутахассислар ва архитекторларни жалб қилиш режалаштирилган. Гейл тавсияларини ҳисобга олган ҳолда пиёдалар йўлакчаси, велосипед йўллари, пандуслар қурилади.
Гейлнинг сўзларига кўра, Ўзбекистонда аҳоли учун максимал даражадаги қулай шароитлар яратиш учун катта салоҳият ва етарлича заҳира мавжуд. Айниқса, кўчалардаги йўлларнинг кенглиги кўплаб қурилишларни амалга оширишга имкон беради. Бироқ бунинг учун кўп вақт талаб этилади. Масалан, Амстердамга бунинг учун 8 – 10 йил сарфланган. Ян Гейл биз билан ишлашга рози бўлади, деган умиддамиз»,—дейди Асомиддин Тожиев.
Бошқарма бошлиғи ўринбосари хорижлик архитекторлар билан биргаликда амалга ошириладиган лойиҳалар муддати ҳозирча номаълум эканлигини билдирди.
Изоҳ (0)