26 сентябрь куни Кроуфордсвилл шаҳрида (Арканзас штати) истиқомат қилувчи фуқаро полиция қўнғироқ қилиб, BackStep Brewing Company пиво ишлаб чиқарувчи заводи ёнида ниқоб таққан, қўлида қуроли бор шахсни кўрганини маълум қилган. Ҳуқуқ-тартибот ходимлари воқеа жойига етиб келганида қуролланган эркак бинодан югуриб чиққан. Полициячилар ундан қуролини ташлашни талаб қилган, бироқ у буйруқни бажариш ўрнига юзидаги ниқобини еча бошлаган. Шунда полиция ходимларидан бири «жиноятчи» томонга ўқ узиб унинг бошини мўлжалга олишига бир бахя қолган, деб хабар берди TJournal.
Кейинроқ маълум бўлишича, бино ҳудудида мустақил фильм суратга олиш ишлари олиб борилаётган бўлган, бироқ бу ҳақида ҳуқуқ-тартибот органлари ва яқин атрофда жойлашган компаниядагилар ҳам бехабар бўлган. Полициячилар мўъжиза туфайлигина ўғри ролини ижро этаётган актёр Жефф Даффнинг бошидан «дарча» очиб қўймаган. Ўқ унинг ёнидан учиб ўтиб бино деворига бориб теккан.
Маҳаллий полиция сержанти Ким Райлининг интервьюда таъкидлашича, унинг ходимлари мутлақо қонун доирасида ҳаракат қилган. Унинг сўзларига кўра, агар фильм суратга олиш ишлари кетаётганини билмаганида ўзи ҳам шундай ҳаракат қилган бўларди. Шунга қарамай ўқ отган полициячи ҳозирча хизматдан четлаштирилган, тергов ишлари эса давом этмоқда.
Изоҳ (0)