Ўзбекистонда мобил қурилмаларнинг IMEI кодларини рўйхатдан ўтказиш таклиф қилинмоқда

Норматив ҳуқуқий ҳужжатлар муҳокамаси порталига Президентнинг «Мобил қурилмаларни Ўзбекистон Республикасига олиб кириш ва рўйхатга олиш тизимини тартибга солишнинг қўшимча  чора-тадбирлари тўғрисида»ги қарори лойиҳаси жойланди, деб ёзади Norma.

Ўзбекистонда мобил қурилмаларнинг IMEI (мобил ускуна халқаро идентификатори, қурилманинг уникал рақами, *#06# терилса, экранга чиқади) кодларини мажбурий тарзда рўйхатга олиш тизимини жорий қилиш таклиф этилмоқда. IMEI кодлари рўйхатдан ўтказилмаган мобил қурилмалардан фойдаланувчи абонентларга уяли алоқа хизматларини кўрсатиш тақиқланади.

Лойиҳани ишлаб чиққан Ахборот технологиялари ва коммуникацияларини ривожлантириш вазирлиги фикрича, бундай чоралар мамлакатга мобил қурилмаларни ноқонуний тарзда олиб келиш ва сертификатланмаган қурилмалардан фойдаланиш олдини олади; мобил қурилмаларни олиб киришда божхона божларининг бюджетга тушишини кўпайтиради; мобил қурилмаларни ноқонуний олиб киришга қарши кураш самарадорлигини оширади.

Рўйхатга олиш тизими оператори — «Ўзбекистон телекоммуникация тармоқларини бошқариш Республика маркази» ДУК, мобил қурилмаларни сертификатлаш бўйича ягона орган — «UNICON.UZ» илмий-тадқиқот ва маркетинг тадқиқотлари маркази бўлади.

IMEI кодларни рўйхатдан ўтказиш учун тўлов олинади, уни Вазирлар Маҳкамаси белгилайди.