Каталония мустақиллиги ҳақида референдум ўтказишга уринишлар муваффақиятсизликка учради. Бу ҳақда Испания бош вазири Мариано Рахой айтиб ўтди, деб ёзади Meduza.
Каталонияликларнинг кўпчилиги, деди Рахой, овоз беришга эътибор қаратмади ва «улар муносиб фуқаролар эканлигини тасдиқлади». «Улар ушбу референдум ноқонуний ва конституцияга зид эканлигини билган», — деди бош вазир.
Рахой таъкидлашича, ҳукумат фуқаролар хавфсизлигини таъминлаш учун барча имкониятларини ишга солган ва у, ҳукумат раҳбари сифатида, бунинг учун қабул қилинган қарорлар учун барча жавобгарликни ўз бўйнига олади.
Шу билан бирга, бош вазир мухторият ҳукумати билан «қонун доирасида ва демократияга ҳурмат сақлаган ҳолда» музокараларни давом эттириш мумкин деб ҳисоблашини айтди.
Эслатиб ўтамиз, Каталония ҳукуматининг расмий вакили Жорди Турул Барселонадаги матбуот анжуманида референдум иштирокчиларининг 90 фоизи Испаниядан ажралиб чиқиш учун овоз берганини маълум қилди.
Изоҳ (0)