АҚШ Марказий разведка бошқармаси рус тилини биладиган олий маълумотлиларни ишга таклиф қилмоқда

АҚШ Марказий разведка бошқармаси (МРБ) «ҳақиқатни фош этиш» учун рус тилини биладиган одамларни ишга олмоқда, деб хабар берди «Корреспондент.net».

«Рус тилини биласизми? Олий маълумотли АҚШ фуқаросимисиз? Миллий хавфсизликка қизиқасизми? Сизнинг кўникмаларингиз бу ерда керак», — дейилади МРБнинг Twitter’даги саҳифасида.

Хабарга бириктирилган расмда ёзилишича, «МРБнинг лингвист-ходими сифатида» «ҳақиқатни фош этиш» мумкин.

Идоранинг ушбу хабари тармоқ фойдаланувчиларининг қизғин муҳокамасига сабаб бўлди. Жумладан, улардан бири «энди Трампнинг иши бор», деб ёзган бўлса, Буюк британиялик фойдаланувчи «Бу иш таклиф этилган энг зерикарли хабар. Кино кўрмайсизларми нима?», деб ёзади. Twitter’нинг америкалик фойдаланувчиларидан бири эса қуйидагича изоҳ қолдирган: «Бу йигитлар нима гап эканлигини билишади. Миш-мишларга қараганда, Россияда сайловлар яқинлашиб келмоқда».