АҚШ очиқ осмон ҳақидаги шартнома доирасида Россия ҳарбий самолётларининг мамлакат устидан амалга ошириладиган назорат парвозларини чеклашни режалаштирмоқда. Бу ҳақда Россия ташқи ишлар вазирлиги маълумотларига асосланиб, «Коммерсантъ» хабар бермоқда.
«Ҳа, АҚШ мазкур ҳаракатни амалга оширишни режалаштираётганидан хабардормиз. Бугун Венада очиқ осмон бўйича комиссиянинг ялпи мажлиси бўлиб ўтади. Афтидан, америкаликлар ўз қарорини ўша ерда расмий равишда эълон қилади. Тушунишимча, мажлисда 2018 йилнинг 1 январидан кучга кирувчи бир нечта чекловлар айтиб ўтилади»,—дейди Россия ташқи ишлар вазирлиги ходими.
Унинг сўзларига кўра, АҚШ ҳукуматининг қарори ўрганиб чиқилади, кейин эса «Россия томонининг мазкур қарорга жавобан чора-тадбирлари хусусида гап кетади».
АҚШ ҳукумати Россияга нисбатан янги чекловларни жорий этишга тайёргарлик кўраётгани ҳақида аввалроқ The Wall Street Journal ўзининг манбаларига асосланиб, хабар берган эди.
Нашр суҳбатдошларидан бири Аляска ва Гавайи устидаги парвозларга нисбатан чекловлар қўйилишини маълум қилган эди.
Нашрнинг ёзишича, АҚШ шу тарзда Калининград устидаги парвозларнинг чекланишига жавоб қайтаришни режалаштирган.
Изоҳ (0)