Шавкат Мирзиёев 2025 йил 20 август куни Янги Тошкентда ўтказилган тадбиркорлар билан бешинчи очиқ мулоқотдаги нутқида “тадбиркор”, “бизнес”, “корхона”, “солиқ” каби сўзларни энг кўп тилга олди. Иқтисодий тадқиқотлар ва ислоҳотлар маркази мутахассислари президентнинг тадбиркорлар билан мулоқоти чоғида нутқини лингвистик таҳлил қилди.
Давлат раҳбари ўз нутқида жами 4 241 сўздан фойдаланган. Энг кўп “тадбиркор” — 107 марта, “бизнес” — 34 марта, “корхона” — 29 марта, “солиқ” — 21 марта, “инвестиция”, “лойиҳа”, “кредит” — 15 марта, “тизим” — 14 марта, “шароит”, “банк”, “стартап” — 13 марта ва “экспорт” сўзи — 12 марта тилга олинган.
Бир қатор асосий ибораларга алоҳида эътибор қаратилди, “бизнес вакиллари” — 8 марта, “очиқ мулоқот” — 7 марта, “имтиёзли кредит” — 4 марта такрорланган. Шунингдек, нутқда “Янги Ўзбекистон”, “кичик бизнес”, “ёш тадбиркор”, “якка тадбиркор”, “молиявий хизматлар”, “айланма маблағ” ва “энг илғор” каби иборалар ҳар бири 3 мартадан тилга олинган.
Уч сўздан иборат иборалардан “якка тартибдаги тадбиркор” ва “куч — бу тадбиркорлар” ибораларининг ҳар бири 3 марта қайд этилган. Шунингдек, нутқда “аҳоли ва тадбиркорлар”, “лицензия ва рухсатнома”, “боғча ва мактаб”, “кичик бизнес учун”, “имтиёзли кредит ажратилади”, “қўллаб-қувватлашга тайёрман”, “қарздорлик учун жарима”, “банд қилган шахс” ва “оилавий меҳмон уйлари” ибораларининг ҳар бири 2 мартадан тилга олинган.
Шу тариқа, нутқдан кўринадики, президент тадбиркорларни ислоҳотларнинг асосий кучига айлантиришга эътибор қаратди ҳамда солиқ, кредит, инвестиция, бизнес юритиш шароитлари ва экспортни ривожлантириш каби муҳим масалаларни ҳам алоҳида таъкидлади.
“Бу сўзларнинг кўп такрорланиши нутқда асосий эътибор тадбиркорликни қўллаб-қувватлаш, инвестиция ва кредит механизмларини кенгайтириш, солиқ юкини енгиллаштириш ҳамда экспорт салоҳиятини оширишга қаратилганини кўрсатади”, дейилади таҳлилда.
Сўнгги тўрт йилда қилинган лингвистик таҳлиллар
Ўтган тўрт йил ичида президентнинг тадбиркорлар билан бўлган мулоқотларида ишлатган сўзлари муайян тенденцияларни кўрсатди. “Тадбиркор” сўзи энг кўп такрорланган бўлиб, бу тадбиркорлар давлат сиёсатида марказий ўрин эгаллаганини кўрсатади. “Солиқ” сўзи 2023 йили анча кўп ишлатилган, кейинги йилларда эса камайган, бу эса солиқ маъмурчилигини босқичма-босқич ислоҳ қилиш ва тадбиркорлар учун имтиёзли шарт-шароитлар яратилаётганини кўрсатади.
“Кредит” ва “инвестиция” сўзлари доимий равишда ишлатилиб, молиялаштириш ва сармоя жалб қилиш сиёсатининг узлуксизлигини таъкидлайди. “Хизмат” сўзи 2024 йили 3-4 баравар кўпайган ва 2025 йили ҳам эътибор марказида бўлган. Бу мамлакатда хизмат кўрсатиш соҳасига эътибор кучайганини, туризм, таълим ва тиббиёт каби хизмат йўналишлари иқтисодий сиёсатнинг муҳим драйверига айланганини кўрсатади.
2025 йилда “стартап” сўзининг ишлатилиши кескин ортди. Бу ҳолат давлат томонидан инновациялар, рақамли иқтисодиёт ва ёшлар ташаббусларига стратегик йўналиш сифатида катта эътибор қаратилаётганини кўрсатади. Шунингдек, сўнгги йилларда “инфратузилма” ва “шароит” каби атамалар ҳам кўпроқ тилга олинган. Бу бизнес муҳитини яхшилаш ва қулай шарт-шароитлар яратишнинг доимий вазифа эканини англатади.
Сўнгги тўрт йиллик таҳлил давлат раҳбарининг чиқишларидаги асосий эътибор босқичма-босқич солиқ ва кредит сиёсати масалаларидан хизмат кўрсатиш соҳаси, стартаплар ҳамда инфратузилмани ривожлантириш масалаларига ўта бошлаганини кўрсатди.
2022—2025 йилларда энг кўп ишлатилган сўзларнинг қиёсий таҳлили
Сўзларни йўналишлар бўйича тақсимоти президент энг катта эътиборни ҳуқуқий муҳит ва инвестициявий иқлим масалаларига (21 фоиз), шунингдек, стартапларни молиялаштириш ва қўллаб-қувватлашга (17 фоиз) қаратганини кўрсатди.
Изоҳ (0)