19 сентябрь куни Мексика пойтахти яқинида содир бўлган зилзила оқибатида ҳалок бўлганлар сони 325 кишига етди. Бу ҳақда Associated Press агентлигига таяниб, «Интерфакс» хабар берди.
Ҳалок бўлганларнинг ярмидан кўпи (186 нафари) Мехико ҳисобига тўғри келмоқда.
Ер ости силкинишидан сўнг вайрон бўлган 38 та бинодан ташқари шаҳардаги яна юзлаб уйларнинг қулаб тушиш хавфи бор. Маҳаллий ҳукумат одамларга хавф туғдириши мумкин бўлган камида 360 та иншоотни аниқлади.
Фавқулодда хизматларга ўз уйининг деворларидан янги ёриқларни топган фуқаролар тинмай қўнғироқ қилмоқда. Кўплаб одамлар ўз хавфсизлигидан хавотирланиб ишхоналарига боришга қўрқишмоқда.
Мехикодаги 9 минг мактабдан фақатгина бир неча юзтаси ишламоқда, қолганлари тозаланиб ва хавфсизлик учун текшириб бўлингунига қадар икки-уч ҳафта вақт ўтади. Дастлабки маълумотларга кўра, камида еттита мактабнинг қулаб тушиш хавфи бор.
Аввалроқ, зилзила оқибатида 293 киши ҳалок бўлгани ҳақида хабар берилганди. Уларнинг 20 нафари мактаб биноси вайроналари остида қолиб ҳалок бўлган.
Изоҳ (0)