Португалиялик мутахассис Паулу Бенту Ўзбекистон миллий терма жамоасига бош мураббий этиб тайинланиши мумкин. Бу ҳақда Championat.asia нашри хабар бермоқда.
Манбага кўра, айни пайтда Ўзбекистон футбол ассоциацияси мураббийнинг вакиллари билан музокаралар олиб бормоқда. Бентунинг сўнгги иш жойи Бирлашган Араб Амирликлари (БАА) терма жамоаси бўлган. У жамоани Жаҳон чемпионати йўлланмасига олиб чиқа олмагач, истеъфога чиқарилганди.
Паулу Бенту мураббийлик фаолияти давомида Португалиянинг “Спортинг”, Бразилиянинг “Крузейро”, Грециянинг “Олимпиакос” ва Хитойнинг “Чунцин Лифан” клубларида ишлаган. Шунингдек, у Португалия, Жанубий Корея ва БАА терма жамоаларини бошқарган.
У икки марта Жаҳон чемпионатида қатнашган: 2014 йилда Бразилияда Португалия терма жамоасини бошқарган ва гуруҳ босқичида мусобақани тарк этган. 2022 йил Қатарда ўтган мундиалда Жанубий Корея терма жамоаси билан плей-офф босқичига чиққан, аммо 1/8 финалда Бразилияга 1:4 ҳисобида ютқазган.
Маълумот ўрнида, ҳозирда Ўзбекистон терма жамоасини Тимур Кападзе бошқармоқда. Унинг қўл остида жамоа тарихда илк бор Жаҳон чемпионати йўлланмасини қўлга киритди.
Изоҳ (0)