Қозоғистон автомобиль тармоғи корхоналари уюшмаси «КазАвтопром» мамлакат иқтисодиёт вазири Тимур Сулаймоновга Ўзбекистон билан ҳамкорлик истиқболларидан ташвиш билдирилган мактуб йўллади. Бу ҳақда EADaily хабар бермоқда.
19 сентябрда Ўзбекистон Президенти Шавкат Мирзиёевнинг «Ташқи иқтисодий фаолиятни янада тартибга солиш чоралари тўғрисида»ги қарори лойиҳаси эълон қилинди. Қозоғистон автосаноати унда маҳаллий ишлаб чиқарувчилар маҳсулотларининг Ўзбекистон бозорига кириб боришида муайян қийинчиликларни кўрди.
«Ҳужжат матни Қозоғистонда ишлаб чиқарилган автомобиль техникаси учун акциз ставкаларини куб сантиметр учун 2,4 доллар қийматида сақланиб қолинишини назарда тутади. Россия ва Украина ҳудудидан автомобиллар импортида эса божхона қийматининг 2 фоизи миқдоридаги рамзий акциз ставкаси белгиланган. Бошқача қилиб айтганда, лойиҳа шу таҳрирда тасдиқланиши билан Ўзбекистон бозори Қозоғистон автоишлаб чиқарувчилари учун ёпиқлигича қолади, уларнинг маҳсулоти эса рақобатдан маҳрум бўлади», — дейилади мактубда.
Уюшмага кўра, Қозоғистон ва Ўзбекистон ўртасида автомобиль техникаси етказиб беришдаги тенгсизлик салкам 15 йилдан бери сақланиб келмоқда. 1996 йилдан бери Ўзбекистон автосаноати корхоналари Қозоғистон бозорига умумий қиймати 720 миллион долларга тенг 85 мингдан ортиқ автомобиль экспорт қилди. Бу маҳсулотларга Қозоғистон чегарасини кесиб ўтишда божхона божи ва акцизлар қўлланмайди. Қозоғистон автомобиль техникасининг Ўзбекистон бозорига етказиб берилиши эса нолга тенг — қатъий божхона-тариф тўсиқлари қўйилган.
Шу муносабат билан Қозоғистон автосаноати маҳсулотлари борасида Ўзбекистондаги тариф сиёсати қайта кўриб чиқилиши, уларнинг бозорга кириб боришида кўмак берилиши ёки қўшни давлатга нисбатан жавоб чоралари қўлланиши сўралган.
Маълумот учун, Тошкент яқинда бўлиб ўтган қўшма бизнес-форумда Ўзбекистон бозорига Қозоғистонда ишлаб чиқарилган Lada машиналарини етказиб бериш масаласи кўтарилганди.
Изоҳ (0)