Ироқ Курдистони мустақиллиги учун бўлиб ўтган референдумда 3,3 миллиондан ортиқ киши иштирок этди

Ироқ ҳудудидаги Ироқ Курдистони автоном вилоятининг мустақиллиги учун бўлиб ўтган референдумда 3,3 миллиондан ортиқ инсон иштирок этди. Бу ҳақда Сайловлар ва референдумлар бўйича Олий мустақил сайлов комиссиясининг расмий вакили Ширван Зарари Al Sumaria телеканалига маълум қилди, деб хабар берди «ТАСС».

Унинг сўзларига кўра, «овоз бериш жараёнларида 3 305 925 киши иштирок этган» ва «референдумда ўз овозини беришни истаганлар улуши 72,16 фоизни ташкил қилган».

Rudaw курд телеканалининг дастлабки маълумотларига кўра, овоз берувчиларнинг 95 фоиздан ортиғи автоном вилоятнинг мустақиллигини ёқлаган.

Телеканалнинг хабар беришича, Сулаймония вилоятининг Халабжа шаҳридаги сайловчиларнинг 95,4 фоизи мустақиллик учун овоз берган. Ушбу шаҳарда 80 мингга яқин одам истиқомат қилади. Найнава вилоятидаги Акра аҳоли пункти сайловчиларнинг 97,6 фоизи мустақиллик учун «ҳа» деб жавоб берган. Шунингдек, референдумга келган бошқа ҳудудлар ҳақида ҳам маълумотлар берилди. Арбиль шаҳрида рўйхатдан ўтган сайловчиларнинг 84 фоизи, Киркукда деярли 79 фоизи, Дахукда 90 фоизи референдумда овоз берган.

Бироқ ушбу маълумотлар ҳозирча расман тасдиқланмади.

25 сентябрь, душанба куни маҳаллий вақт билан соат 19:00 да якунланган референдум натижалари 72 соат ичида эълон қилинади.