Қозоғистон Сенати раиси Қасим-Жўмарт Тўқаев бошчилигидаги Қозоғистон делегацияси 25 сентябрь куни Самарқанд шаҳрига келди. Бу ҳақда Ўзбекистон Сенати ахборот хизмати хабар бермоқда.
Меҳмонларни Самарқанд халқаро аэропортида Самарқанд вилояти ҳокими вазифасини бажарувчи Туробжон Жўраев кутиб олган.
Делегация аъзолари Ҳазрати Хизр мажмуасида бўлган, Ўзбекистон Биринчи Президенти Ислом Каримов қабрига гул қўйиб, унинг хотирасига ҳурмат бажо келтирган.
Қасим-Жўмарт Тўқаев бошчилигидаги Қозоғистон делегацияси Самарқанддаги Имом Бухорий мажмуасига ҳам ташриф буюрган. «Ўтганлар хотираси ёд этилиб, Қуръон тиловат қилинди», — дейилади Сенат ахборотида.
Ўзбекистон Ташқи ишлар вазирлиги матбуот хизмати хабарига кўра, расмий ташриф дастуридан Ўзбекистон Олий Мажлиси Сенати ва Қонунчилик палатасида парламентлараро ҳамкорликнинг истиқболли йўналишлари бўйича учрашув ўтказиш ўрин олган.
«Қозоғистон делегацияси Ўзбекистон Президенти Шавкат Мирзиёев томонидан қабул қилиниши кутилмоқда», — дейилади ТИВ ахборотида.
Изоҳ (0)