Халқ таълими вазирлиги ҳамда молия вазирлигининг 2017 йил 11 сентябрдаги қарори билан мактабгача таълим муассасалари ва мактаб-интернатлардаги болалар таъминотига ҳақ тўлаш тартиби тўғрисидаги низомга ўзгартиришлар киритилди. Бу ҳақда Norma хабар бермоқда.
Белгиланишича, мактабгача таълим муассасалари ва мактаб-интернатлардаги болалар таъминоти учун тўланадиган тушумлар бошқа бюджет маблағлари билан бирга тарбияланувчиларни озиқ-овқат билан таъминлашни ҳамда муассасанинг моддий-техника базасини яхшилашга (авваламбор, санитария-гигиена воситалари ва юмшоқ инвентарлар харид қилишга) йўналтирилади. Бунда муассасанинг моддий-техника базасини яхшилашга йўналтириладиган маблағлар миқдори жами йил давомида ота-оналар тўловидан тушган маблағларнинг 5 фоизидан ошмаслиги лозим.
Илгари маблағлар тарбияланувчиларни озиқ-овқат билан таъминлашни яхшилашга йўналтирилиши назарда тутилган эди.
Низомга киритилган ўзгартиришлар 2017 йил 18 сентябрда кучга кирди.
Изоҳ (0)