Ўзбекистон Президенти Шавкат Мирзиёев БМТ Бош Ассамблеясининг 72-сессиясидаги нутқида Ўзбекистонда қандай ўтмиш қолдиқлари бекор қилиниб, қандай янгиликлар жорий этилаётганига тўхталиб ўтди.
«Халқаро меҳнат ташкилоти билан ҳамкорликда болалар меҳнати ва мажбурий меҳнатга барҳам бериш бўйича таъсирчан чоралар кўрилди, — деди у. — Бирлашган Миллатлар Ташкилотининг Инсон ҳуқуқлари бўйича Олий комиссари жаноб Ал-Ҳусайннинг ташрифи якунлари бўйича инсон ҳуқуқларини ҳимоя қилиш кафолатларини мустаҳкамлаш юзасидан чора-тадбирлар дастури ишлаб чиқилди».
«Одамларнинг эркин ҳаракат қилишини чеклайдиган хорижга чиқиш визалари сингари умрини мутлақо ўтаб бўлган ўтмиш қолдиқлари бекор қилинди», — дея Президент хорижга чиқиш паспортларини жорий этиш борасидаги режаларни ошкор қилди.
Шавкат Мирзиёев инсон ҳуқуқларини ҳимоя қилиш масалалари бўйича миллий ва халқаро нодавлат ташкилотлар билан очиқ мулоқотимиз фаоллашиб бораётгани, инсонпарварлик тамойилларидан келиб чиқиб, шахсни қамоқда сақлаш билан боғлиқ кўплаб ҳолатлар қайта кўриб чиқилгани, экстремизм ғоялари таъсирига тушиб қолган, тўғри йўлдан адашган фуқаролар ижтимоий реабилитация қилиниб, уларни соғлом ҳаётга қайтариш учун зарур шароитлар яратилаётганини айтди.
«Эндиликда инсон ҳуқуқ ва эркинликларини ҳимоя қилиш соҳасидаги барча ҳуқуқни муҳофаза қилиш органлари фаолияти парламент ва фуқаролар томонидан доимий назорат қилиб борилмоқда. Мамлакатимизда сиёсий партиялар, фуқаролик жамиятининг роли ортиб бормоқда, суд органларининг чинакам мустақиллиги таъминланмоқда. Оммавий ахборот воситаларининг ўрни сезиларли даражада ортиб бормоқда», — деди у.
Эслатиб ўтамиз, Ўзбекистонда 2019 йил 1 январдан хорижга чиқиш учун алоҳида биометрик паспортлар жорий этилади. Чет элга чиқиш рухсатномаси (стикер)ни расмийлаштириш тартиби ҳам шу санадан бошлаб бекор қилинади.
Изоҳ (0)