Футболдан четлаштирилган ҳакам Рустам Бобомуродов ўйинни ҳалол бошқаргани ҳақида айтди, у тушкунликда

Футбол бўйича Ўзбекистон Олий Лигасининг 21-туридан жой олган «Бухоро» — «Динамо» ўйини ҳаками Рустам Бобомуродов инспектор Артём Арутюнов томонидан 4 балл, яъни, 2 баҳога лойиқ кўрилган, кейинроқ ЎФФ уни футбол ҳакамлигидан бутунлай четлатганди.

«Championat.asia» нашри журналисти Хайрулла Холиқов бу ишлардан сўнг Рустам Бобомуродовнинг ўзи билан суҳбатлашди.

Мен учрашувни яхши бошқардим, деб ўйлайман. Ҳеч бир томонга ён босганим йўқ ва ўйин пайти нимани кўрган бўлсам, шунга қараб қарор чиқардим.

«Динамо» дарвозаси томон пенальти берилмаган ҳолатга келсак, ўша вазиятда «Бухоро» футболчиси тўпга бош билан зарба берган пайтда, рақиб ўйинчиси ҳам тўпни қайтариш учун сакради. Биласиз, одам сакраганда қўли ҳам беихтиёр юқорига кўтарилади. Кейинчалик ўша вазият фотосурати ҳам чиқди. Расмга эътибор беринг, «Динамо» футболчиси сакраётганда тўпга қарамаётганди, у кўзларини юмиб олганини кўрасиз. Демак, футболчи шунчаки тўпни қайтараман, деб ўйлаган, тўпга ўйнайман деган фикр бўлмаган.

Яна бир вазият биринчи таймда рўй берди. Икки жамоа футболчиси жарима майдончаси ичида бир-бирига урилиб, йиқилди. Бу пенальтига умуман тортмасди. Шу боис асосий эътироз иккинчи таймдаги ҳолатга бўлди. Агар ҳар бир вазиятга 11 метрлик жарима тўпи қўяверсак, кейин яна бошқа гаплар чиқиб келади. Шундай ҳолат ҳам бўлди: самарқандлик футболчини «Бухоро» ўйинчиси ушлаб қолди. Мен бунда ҳам пенальти бермадим, лекин бунга биров эътибор ҳам қилмади.

Мен юрагимга қулоқ солдим, ички ҳиссиёт менга пенальти йўқ деди. Пенальти қўйганимда, эртаси куни атайин пенальти қўйдинг, деган гап тегарди. Ўша вазиятни ҳозир ҳам эслайман: футболчи тўпни қўли билан қасддан ўйнамади, тўп бехосдан унинг қўлига тегиб кетди. Масофа жуда яқин бўлгани учун, мен 11 метрлик жарима тўпи белгиламадим. Агар тўп дарвоза томон бораётган бўлганида ва ўйинчи уни қўл билан қайтариб қолса, бу бошқа гап эди.

Рустам Бобомуродов, футбол ҳаками

Ҳакам учрашувдан кейин вазиятни инспекторга ҳам тушунтирмоқчи бўлгани ҳақида айтди.

Артём Сергеевич футболчи барибир қўл билан ўйнади, деди. Мен тушунтиришга ҳаракат қилдим, лекин у киши эшитмади ва паст баҳо қўйди. Эътироз эса ўша вазият бўйича бўлди. Мен ўйинчиларга яқин жойдан нима бўлганини кўрдим. Назоратчи бизни баҳолайдиган киши, мен эса барибир ўз фикримда қоламан: қўл тўпнимас, тўп қўлни топди.

Рустам Бобомуродов, футбол ҳаками

Тўғриси, ўқиб ўзим ҳам ҳайрон қолдим. Мени яхши танийдиганлар билади, доим ҳам пенальти қўявермайман. Мен футболчиларнинг «жанг» қилишига доим қўйиб берганман. Чунки ҳадеб ҳуштак чалавериш ўйин савиясини тушириб юборади. Бухородаги баҳс шундоқ ҳам асабий руҳда ўтди, стадионга кўплаб мухлислар келишганди. Лекин мен баҳсни адолатли бошқариб боришга ҳаракат қилдим. Бор гап шу.

Ҳозир тушкунликка тушиб ўтирибман. Лекин қўлимдан нима ҳам келарди. Агар федерацияга чақиришса, бориб тушунтириш беришга тайёрман.

Апелляция? Кимга бераман? Дардимни ким эшитади? Ҳамма бир бўлиб қарор чиқарган бир пайтда кимга нима дея оламан? Мен 17 йил ҳакамлик қилиб, бирор марта икки баҳо олмаганман. Бундан-да қийин ўйинларни бошқарганман. Агар олдин ҳам бир-икки марта икки олганимда, одамлар Рустамнинг бўлгани шу, олдин ҳам шунақа қилган, деб айтса бўларди.

Рустам Бобомуродов, футбол ҳаками