Футбол бўйича Ўзбекистон Олий Лигасининг 21-туридан жой олган «Бухоро» — «Динамо» ўйинини бошқарган рефери Рустам Бобомуродов футболдан четлатилди. Бу ҳақда ЎФФ матбуот хизмати маълумот берди.
Бундай қарорга ЎФФ янги президенти Умид Аҳмаджоновнинг топшириғи асосида келинган. Бунгача Рустам Бобомуродовнинг ҳакамлиги инспектор томонидан 4 балл, яъни, 2 баҳога лойиқ кўрилган, кейинроқ бухоролик футбол мухлислари унинг устидан ЎФФ президенти виртуал қабулхонасига шикоят ёзган. 0:0 ҳисоби билан якунига етган ўйинда Бобомуродов 2 та яққол пенальтини беришни истамаган, шунингдек, учрашув давомида меҳмонлар фойдасига кўп бор «адашгани» мактубда қайд этилганди.
16 сентябрь кунги ўйин учун якуний қарор орадан 4 кун ўтиб — 20 сентябрь куни эълон қилингани диққатга сазовор. Рустам Бобомуродовнинг ҳакамлигини ЎФФ ҳакамлар ва инспекторлар илмий-услубий таъминоти бўлими кўриб чиққан. Бўлим бошлиғи Арслон Хатамов ҳам якунда Рустам Бобомуродовга 4 балл қўйган.
Ҳакамлар ва инспекторлар бошқармаси бошлиғи Ноил Лутфуллин қўмита йиғилишида сўзга чиқиб, Рустам Бобомуродов масаласи бўйича «Ҳакамларнинг тартиб-интизом кодекси» асосида қарор қабул қилишни таклиф қилди. Натижада «Бухоро» — «Динамо» ўйинида бир неча жиддий хатоларга йўл қўйган Рустам Бобомуродовнинг хизмат ҳақи юз фоизга камайтирилиб, ҳакамликдан бутунлай четлатилган.
Изоҳ (0)