Талл-Афар шаҳри учун олиб борилган жанглардан сўнг ИШИД жангариларининг 400 га яқин хотинлари, шу жумладан, Россия, Ўзбекистон ва Туркманистон фуқаролари Ироқ ҳарбийлари қўлига тушди, деб ёзади «РИА Новости» Ироқ армияси вакилига таяниб.
«ИШИД жангарилари қамалда қолгач, улар бизга ўз оилалари билан бирга таслим бўлди. Жами 600 га яқин жангари таслим бўлди», — деди Ироқ армияси вакили. Унинг сўзларига кўра, Ироқ ҳукумати ўз қўлларига тушган қарийб 400 нафар аёлни ИШИД жангариларининг хотинлари деб тахмин қилмоқда. «Уларнинг кўпчилиги Талл-Афарга Туркия, Европа, Чеченистон, Миср, Тунис ва бошқа мамлакатлардан келган. Бу ерга келгач, улар ўз хоҳиши билан ИШИД жангариларига турмушга чиққан», — деди ҳарбий.
Аёллар ҳозир «Хамам Эли» лагерида тутиб турилибди. Ироқ ҳукумати уларнинг ИШИД билан алоқасини ўрганмоқда. «Агар улар орасида айбсизлар борлигини аниқласак, уларни қўйиб юборамиз», — деди ҳарбий.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)