Давлат рақобат қўмитаси томонидан ўтказилган хатловлар Ангрен шаҳри ҳудудида аввал хусусийлаштирилган ҳамда бугунги кунда бўш турган 65 та объектлар мавжудлигини кўрсатмоқда, деб хабар беради қўмита ахборот хизмати.
Мазкур объектларнинг жами қурилиш майдони 110,1 минг квадрат метрни, эгаллаган ер майдонлари 130,1 гектарни ташкил этади. Ушбу объектлар қаторига собиқ «Ангрен нон маҳсулотлари заводи», собиқ «Кулол» АЖ, собиқ «Саноат қалин қоғоз савдо» АЖ, «Ангрененергоцветмет», «Ностандарт ускуналар заводи» каби йирик ишлаб чиқариш мажмуалари киритилган.
Ўзбекистон Республикаси Президентининг 2017 йил 23 февралда қабул қилинган ПҚ-2796-сонли қарорига мувофиқ, жойларда Қорақалпоғистон Республикаси Вазирлар Кенгаши Раисининг, вилоятлар ҳамда Тошкент шаҳри ҳокимларининг биринчи ўринбосарлари бошчилигида Идоралараро комиссиялар тузилган.
Ушбу комиссияларга аввал хусусийлаштирилган корхона ва объектларнинг қайтадан тўла қувватда ва самарали ишлашини таъминлаш вазифаси юклатилиб, тадбиркорларнинг инвестиция лойиҳаларини амалга оширишида амалий ёрдам бериш бўйича кўплаб ваколатлар берилган.
Ҳозирда Ангрен шаҳридаги бўш объектлардан 40 таси негизида мулкдорлар томонидан янги ишлаб чиқариш ва хизмат кўрсатиш объектларини ишга тушириш бўйича лойиҳаларни амалга ошириш таклифи берилган.
Изоҳ (0)