Айрим фуқаролар ўзларининг ноутбук, қўл телефони ва бошқа ахборот ташувчи воситаларида беҳаёлик ва зўравонликни тарғиб этувчи материалларни божхонадан олиб ўтишга бўлган уринишлари учрамоқда, деб хабар берди Тошкент шаҳар божхона бошқармаси матбуот хизмати.
Тошкент шаҳар божхона бошқармаси ходимлари томонидан беҳаё ва зўравонлик мазмунидаги фотосуратлар, видеофильм ва роликларни божхона чегараси орқали ноқонуний олиб ўтишга ҳаракат қилган бир гуруҳ «телеграммчилар» аниқланди.
Жумладан, «Келес» темир йўл чегара божхона пости ходимлари «Новосибирск—Тошкент» йўналиши бўйича кириб келган поезд йўловчиси фуқаро Ж.Жумаевда (исм-шарифлар ўзгартирилган) йўловчи божхона декларациясида кўрсатилмаган ва оғзаки сўровда тақдим қилинмаган Samsung русумли уяли телефон борлиги аниқланди. Телефоннинг Telegram номли пaпкасида 12 дона беҳаё мазмундаги видео ва 65 дона беҳаё мазмундаги фото файллар ҳамда ваҳшийликни тарғиб қилувчи видео ролик борлиги маълум бўлди.
Шунга ўхшаш ҳолатда «Москва—Тошкент» йўналиши бўйича кириб келган фуқаролар М.Узоқов ва Б.Закировлар божхона назоратидан четлаб олиб ўтмоқчи бўлган Samsung русумли уяли телефонларининг Telegram пaпкасида 84 дона беҳаё мазмундаги видео файллар ва 255 дона фото суратлар борлиги маълум бўлди. Телефон эгалари қўл телефонларига фото ва видео файллар қандай қилиб тушиб қолганидан гўёки бехабар.
Мазкур ҳолатлар юзасидан божхона органлари томонидан Ўзбекистон Республикасининг Маъмурий жавобгарлик тўғрисидаги кодексининг 189-моддаси билан маъмурий иш юритилиб, кўриб чиқиш учун тегишли суд идораларига юборилди.
Эслатиб ўтамиз, Ўзбекистон Республикасининг Маъмурий жавобгарлик тўғрисидаги кодексига кўра, порнографик, шунингдек, зўравонликни ёки шафқатсизликни тарғиб қилувчи маҳсулотни олиб кириш, тарқатиш, реклама қилиш, намойиш этиш фуқароларга энг кам иш ҳақининг 50 бараваридан 100 бараваригача, мансабдор шахсларга эса 100 бараваридан 150 бараваригача миқдорда жарима солишга сабаб бўлади.
Шундай ҳаракатлар маъмурий жазо қўлланилганидан кейин такроран содир этилса, у ҳолда айбдор шахслар Ўзбекистон Республикасининг Жиноят кодексига мувофиқ, энг кам ойлик иш ҳақининг 400 бараваридан 600 бараваригача миқдорда жарима ёки уч йилгача ахлоқ тузатиш ишлари ёки олти ойгача қамоқ билан жазоланади.
Изоҳ (0)