2018 йил Россияда бўлиб ўтадиган футбол бўйича Жаҳон Чемпионатининг чипталари бугундан сотувда. Бу ҳақда ФИФА сайти хабар берди. «Championat.asia» нашри эса чипта сотиб олиш тартибини ўзбек тилида тушунтирди.
14 сентябрь Тошкент вақти билан 14:00 дан бошлаб бутун жаҳон футбол ишқибозлари катта байрамга қўшилиши мумкин. Чунки бу вақтда ЖЧ—2018 чипталари сотуви FIFA.com сайтида бошланади.
Биз барча мухлисларга тенг имконият тақдим этадиган чипта харид қилиш тизимини ишлаб чиқдик. Мундиалларда мухлислар спорт байрамининг муҳим қисми бўлиб келган. Россиядаги Жаҳон Чемпионати бу борадаги анъаналарини давом эттириб, ташкилотчилик ва турнир атмосфераси томондан уникал воқеликка айланади.Чипталар сотуви бир неча босқичдан иборат бўлади. Масалан, биринчи босқичнинг ўзи икки даврдан иборат.Фатма Самура, ФИФА бош котиби
I босқич
1-давр. 14 сентябрдан 12 октябргача давом этади. Сиз исталган кун учун чиптага сўров берсангиз, ҳамма сўровлар учун имконият тенг бўлади. Олдин буюртма берган одам имконияти, кейинроқ берган одамникидан юқори эмас, шунчаки, белгиланган вақтда берилса бўлди. Агар сўровлар сони чипталар сонидан ошиб кетса, чипта эгаси тасодифий қуръа йўли билан аниқланади. Сўров берганларнинг барчасига 16 ноябрь куни жавоб хати келади.2-давр. 16—28 ноябрь кунлари бўлиб ўтади. Бу вақтда чипталар жонли навбат йўли билан сотилади.
II босқич
2017 йилнинг 1 декабрь куни ЖЧ—2018 га қуръа ташланади ва II босқич бошланади. У биринчиси каби тасодифий қуръа (5 декабрдан 31 январгача) ва жонли навбат (13 мартдан 3 апрелгача) йўли билан аниқланади.Бу босқичдан муваффақиятли ўтганларга чипталар мундиал бошланишига бир неча ҳафта қолганда текинга етказиб берилади. Чипталарни етказиб бериш апрель—май ойларидан олдин бошланмайди.«Сўнгги онлар» сотуви
Чипталарни сотиб олишнинг сўнгги имконияти «Сўнгги онлар» босқичида бўлади. Чипталар жонли навбат усулида сотилади. Бу босқич 18 апрелда бошланиб, ЖЧ—2018 финали бўлиб ўтадиган 15 июлда якунига етади.I босқичда қайси типдаги чипталарни харид қилиш мумкин?
- Алоҳида бир ўйин учун чипталар. Яъни, турнирдаги хоҳлаган учрашувингиз учун.
- Алоҳида бир стадион учун чипталар пакети. Яъни, аниқ бир стадионда ўтказиладиган учрашувлар учун чипталар жамланмаси. Унга очилиш ўйини кирмайди, гуруҳ босқичи, 1/8 финал ва 3-ўрин учун баҳслар эса киради. Масалан, «Лужники» стадиони учун чипталар пакетига гуруҳ босқичининг 3 та ўйини 1/8 финалнинг 1 та учрашуви киради. Бу каби пакетлар талаб катта бўлган очилиш, ярим финал ва финал ўйинларини ўз ичига олмайди.
- Алоҳида бир жамоанинг ўйинлари учун чипталар пакети. Яъни, алоҳида терма жамоа учун чипталар пакети. Бундай типдаги чипталар билан 3 тадан 7 тагача учрашув томоша қилиш мумкин. Бундай пакет фақат I босқичда сотилади.
- Россияликлар учун чипталар. 2010 ва 2014 йилги мундиаллар каби, мезбон мамлакат резидентлари учун махсус нарх бўйича алоҳида категориядаги чипталарни харид қилишнинг эксклюзив имконияти бўлади. Нарх 1280 рублдан бошланади.
- Алоҳида категориядаги шахслар учун чипталар. ФИФА ногирон, кам таъминланган ва ортиқча вазнга эга бўлган мухлислар учун алоҳида чипталар ажратишга қарор қилган.
Харид қилиш усуллари
I ва II босқичларда чипталарни қуйидаги йўл билан харид қилиш мумкин:- Visa банк карталари (ФИФА расмий ҳамкори)
- Бошқа тўлов усуллари
- Мухлис паспорти
Россия ҳукумати ташаббуси билан ЖЧ—2018 ўйинлари учун чипта харид қилган ҳар бир ишқибоз мухлис паспортига ҳам эга бўлиши керак. Тасодифий қуръа йўли билан чипта харид қилиш муддати тугагач, чипта эгаларига мухлис паспорти учун сўровнома юборишни маслаҳат берамиз. Паспорт бепул берилади.
Бу ноқулайлик эмас, аксинча, мухлисларга қулайлик яратади. Уларга қўшимча хизмат ва устунликлар тақдим этилади. Масалан, Россия ҳудудига визасиз кириш имконияти, мундиалга мезбонлик қилувчи шаҳарлар орасида текин саёҳат, учрашув куни жамоат транспортидан бепул фойдаланиш. Мухлис паспорти ҳақида қўшимча маълумотлар www.fan-id.ru сайтида берилган.
ФИФА сўров бериш, мухлис паспортини етказиш ёки ундан фойдаланиш учун маъсулиятни ўз зиммасига олмайди.
Изоҳ (0)