Корея фан ва техника илғор институти (KAIST) нинг Глобал тижорат маркази (Global Commercialization Centre, GCC) директори Чой Мун-ки раҳбарлигидаги делегация Тошкент шаҳридаги Инҳа университети (IUT)га истиқболдаги ҳамкорлик йўналишларини муҳокама қилиш учун ташриф буюрди. Бу ҳақда университет сайти хабар бермоқда.
IUT Ректори Сарвар Бобохўжаев, IUT нинг биринчи проректори Чо Во Суг, Mirzo Ulugbek Innovation Center Инновация маркази директори Хуршид Султонов меҳмонларни қутлади.
Учрашув давомида IUT нинг биринчи проректори Чо Во Суг ахборот технологиялари ҳамда логистика йўналиши бўйича кадрларни тайёрлайдиган университетнинг фаолияти тўғрисида гапириб берди. Меҳмонларга шунингдек, ёшлар ўртасида аниқ фанларни ўрганишга бўлган қизиқишни ошириш ҳамда ўқитувчи-профессор ва талабалар учун яратилган шароитлар тўғрисида маълумот берилди.
Ўз навбатида, Хуршид Султонов 2017 йилнинг 30 июль куни Ўзбекистон Республикаси Президентининг фармони билан ташкил этилган Ахборот технологияларини ишлаб чиқиш ва жорий қилишни қўллаб-қувватлаш бўйича «Mirzo Ulugbek Innovation Center» Инновация марказининг тақдимотини ўтказди. Меҳмонлар мазкур Марказнинг Ўзбекистонда ахборот технологияларини ривожлантириш учун ташкил этилганлиги тўғрисида хабардор қилинди. Қайд этилдики, Марказ резиденти бўлган юридик шахслар қатор солиқ ва божхона имтиёзларига эга бўлади.
KAIST GCC вакиллари Жанубий Кореянинг етакчи техник университетларидан бирининг, жумладан Глобал тижорат маркази фаолияти тўғрисида батафсил маълумот берди. Корея томонининг қайд этишича, Глобал тижорат маркази дунёнинг турли бурчакларида Корея технологияларини тарғиб қилади.
Тақдимотлардан сўнг, томонлар икки ташкилот ўртасидаги ҳамкорликнинг истиқболли йўналишларини муҳокама қилди. Жумладан, Mirzo Ulugbek Innovation Center лойиҳаси доирасида ҳамкорлик қилиш масалалари кўриб чиқилди.
Учрашув сўнггида Чой Мун-ки Тошкент шаҳридаги Инҳа университетининг фахрий меҳмонлар учун китобида ўз дил сўзларини ёзиб қолдирди. Делегация аъзолари шунингдек, талабалар ва ўқитувчилар учун қурилган янги кампус билан ҳам танишди.
Изоҳ (0)