Вазирлар Маҳкамасининг 28 августдаги қарори билан 2017—2021 йилларда давлат солиқ хизмати органларининг моддий-техника базасини мустаҳкамлаш чора-тадбирлари дастури тасдиқланди, деб ёзади Norma.
У Давлат солиқ хизмати ҳудудий органларининг маъмурий биноларини реконструкция қилишни (жами 11 та объект, йилига 2 та объектдан, шу жумладан 2017 йилда — Сирдарё вилояти ДСБ ва Қўшрабод тумани ДСИ), Давлат солиқ хизмати ҳудудий органларининг маъмурий биноларини капитал таъмирлашни (жами 68 та объект, ҳар йили 13 тадан объект ҳисобида), шунингдек, ҳудудий давлат солиқ бошқармалари ва туман (шаҳар) давлат солиқ инспекциялари бошлиқлари учун хизмат уй-жойлари қуришни (ДСБ учун 13 та уй; ДСИ учун 182 та уй) кўзда тутади.
Моддий-техника базасини мустаҳкамлаш доирасида формали кийим-бош тикиш (давлат солиқ хизмати органлари асосий ходимларининг 12131 штат бирликлари учун), ҳудудий солиқ органлари учун мебель сотиб олиш (йилига 3 та ДСБ ва 36 та ДСИ учун), хизмат автомашиналарини харид қилиш (жами 69 та автомашина), шунингдек, муқобил энергия манбалари — қуёш батареяларини ва энергия тежайдиган замонавий қозонхоналар ўрнатиш режалаштирилмоқда.
Дастурни амалга ошириш учун 275 миллиард сўмдан зиёд маблағ керак бўлади, шунинг 7,9 миллиард сўми Давлат бюджетидан, қолгани ДСҚнинг бюджетдан ташқари махсус жамғармасидан ажратилади.
Изоҳ (0)