Ички ишлар вазири ўринбосари Акромхон Бобохоновнинг ташаббусига кўра Тошкент шаҳрининг Мирзо Улуғбек туманида судьялар ва ҳуқуқ-тартибот органлари вакилларининг маҳалла раислари ва фаол фуқаролари олдида чиқиши ташкил этилди. Туман вакилларига улар қандай ҳолатларда қаллоблик қурбонига айланиши ёки жиноят шеригига айланиши мумкинлиги ҳақида гапириб берилди.
«Бугун шаҳарда қотиллик, зўравонлик сингари оғир жиноятлар сони қисқарди, аммо ‘қаллоблик’ моддаси бўйича ишлар сони кўпайди. Шу муносабат билан биз фуқаролар йиғинлари раислари билан суҳбатлар ўтказиб, уларга қаллобларнинг қурбонига айланмаслик йўлларини тушунтирмоқдамиз. Улар эса, ўз навбатида, бу маълумотни уйлар ва маҳаллалар аҳолисига етказиши лозим. Бундан ташқари, бизнинг ходимларимиз уйма-уй юриб, аҳоли билан тушунтириш ишларини олиб бормоқда», — деди туман ИИБ тергов бўлими бошлиғи Баҳром Бегалиев.
Ҳуқуқ-тартибот органлари ходимлари тақдим этган маълумотлар асосида «Новости Узбекистана» нашри энг кенг тарқалган қаллоблик турлари рўйхатини тузиб чиқди.
- Қаллоблар пластик картадан катта миқдордаги пул маблағларини нақдлаштиришни таклиф этади, сўнг пластик картани ҳам, пулни ҳам олиб, ғойиб бўлади.
- Айрим фуқаролар фолбин ва табибларга ишонади. Бундан фойдаланган турли фолбин ва экстрасенслар қаллоблик йўли билан уларнинг пулларини ўзлаштири олади.
- Кўп ҳолларда қаллоблар иш ёки ўқишга киритиб қўйиш таклифи билан чиқади. 1 август — ОТМларга кириш имтиҳонлари ўтказилиш арафасида бу билан боғлиқ қаллобликлар юзасидан бир қанча жиноят ишлари қўзғатилди.
- Қаллоблар ҳуқуқ-тартибот органлари — милиция ёки прокуратура ходимлари сифатида ўзини таништириб, турли масалаларни ҳал этиб бериш баҳонасида тамагирлик қилади. Паспорт ёки ҳайдовчилик гувоҳномаси олиб бериш, четга чиқиш стикерини урдириб бериш, прописка масаласида ёрдам бериш, автомобиль учун давлат рақами олиб бериш шулар жумласидандир.
- Айрим фуқароларнинг четга чиқиши чекланиши муносабати билан бу масалани пул билан ҳал қилишга ваъда берадиган қаллоблар пайдо бўлди.
- Коммунал хизматлар соҳасида ҳам қаллоблик кенг тарқалган. Қаллобликка коммунал хизматларнинг ҳақиқий ходимлари ҳам, сохта гувоҳнома билан юрганлар ҳам қўл уриши мумкин. Улар одатда турли баҳоналар билан пул ундириш, қарздорликни ёки турли қоидабузарликларни рўкач қилади.
- Қора риэлторлар вилоятдан келганларни пойтахтдан кўчмас мулк сотиб олиш ҳақида ваъдалар билан алдайди.
- Фермер хўжаликлари ҳудудида фермерлар хусусий уй қуриш учун ер участкаси ажратишни ваъда қилиши билан боғлиқ ҳолатлар бир неча маротаба кузатилган. Аммо бу нарса қоғозда расмийлаштирилмайди. Натижада қурилган уй фермер хўжалиги мулкига айланади.
- Қалбаки олтин безаклар сотиш билан боғлиқ ҳолатлар учрамоқда.
- Одамлар бирор барқарор даромад олиш учун пул тикишга қизиқади. Бундай фуқароларни алдаш учун айрим молиявий пирамидалар тузади. Бунинг яққол мисоли — Аҳмадбой.
Изоҳ (0)