Грузия собиқ президенти ва Одесса вилояти маъмуриятининг собиқ раҳбари Михаил Саакашвили ўз тарафдорлари билан Польша чегарасига ўрнатилган махсус кучларнинг мудофаасига қарамай, Украина ҳудудига «бостириб» кирди. Улар мамлакат ҳудудига киришганидан сўнг, кучлар чекиниб вазиятга аралашмади, деб хабар берди TJournal.
Украиналик депутат Юрий Деревянко NewsOne каналига берган интервьюсига кўра, одамлар Украина ва Польша чегарасидаги «Шегини» назорат постига тўпланиб олишган ва қанчадир муддатга махсус кучларнинг мудофаасини ёриб ўтиб, Саакашвили ҳамда унинг тарафдорларини «зич ҳалқа кўринишида ўраган ҳолда мамлакат ҳудудига олиб киришган».
Украина Давлат чегара хизмати раҳбарининг ёрдамчиси Олег Слободан эса назорат пунктида жанжал бўлганини сўзлади. Унинг сўзларига кўра, ушбу вазият оқибатларини «ҳатто тахмин қилиш ҳам қийин».
7 сентябрь куни Саакашвили Украина ҳудудига уч кундан сўнг, рафиқаси, кичик ўғли ва Юлия Тимошенко билан «ўз ҳуқуқларини ҳимоя қилиш» мақсадида етиб келишини маълум қилганди.
Аввалига Михаил Саакашвили чегарани «Краковец» орқали кесиб ўтмоқчи эди, бироқ кутилмаганда режалар ўзгариб қолган ва у «Перемишль — Киев» тезюрар поездига ўтирган. Қанчадир вақтдан сўнг поезд тўхтаган ва унинг ичида баланд овозда «Украина ҳудудига кириши тақиқланган фуқаролар вагондан тушмагунича, поезд ҳеч қаерга юрмайди», дея эълон янграган. Шундан сўнг, сиёсатчи ва унинг тарафдорлари Польшанинг «Медика» назорат пости орқали ҳеч қандай муаммосиз чегарани кесиб ўтган, аммо «Шегини» назорат постида уларни Украина махсус кучлари кутиб олишган.
Изоҳ (0)