Бухорода қизга уйланишни ваъда қилиб, унинг 25 миллион сўм пулини алдаб олган ва бошқа аёлга уйланиб кетган фирибгар қўлга олинди

Бухоро шаҳрида яшовчи, 1987 йилда туғилган, якка тартибда ишлайдиган Баҳриддин Ҳамроев Жондор туманида яшовчи Н.Жумаеванинг ишончига кириб унинг пулларини фирибгарлик йўли билан қўлга киритган. Бу ҳақда Бухоро вилояти ИИБ матбуот хизмати хабар берди.

Баҳриддин Ҳамроев Н.Жумаевага узоқ йиллар давомида унга уйланишини, оила қуриб биргаликда яшашни, Lacetti русумли автомашина харид қилиб никоҳ тўйларидан сўнг биргаликда автомашинада юришларини айтиб, содда ва ишонувчан аёлнинг 25 миллион сўм нақд пулларини қўлга киритган.

Ушбу пулларни ўзининг шахсий манфаатлари йўлида сарфлаб юборган Баҳриддин Ҳамроев Н.Жумаева билан турмуш қурмасдан, бошқа аёл билан оила қуриб, ҳозирга қадар Н.Жумаеванинг пулларини қайтариб бермасдан, фирибгарлик жиноятини содир қилган.

Мазкур ҳолат юзасидан Баҳриддин Ҳамроевга нисбатан Ўзбекистон Республикаси Жиноят Кодексининг 168-моддаси 1-қисми билан жиноят иши қўзғатилиб, тергов ҳаракатлари олиб борилмоқда.