Сирдарё аҳолисининг сони бўйича энг ихчам вилоят бўлишига қарамай, мазкур ҳудуд ўзининг ислоҳотлар ва янгиликларга мойиллиги билан ажралиб туради. Бундай ижобий ўзгаришлардан сўнгисини Гулистон шаҳар транспорт тармоғида аҳолига яратилган инновацион қулайликда кўришимиз мумкин.
Ўзбекистон автомобиль ва дарё транспорти агентлиги ҳамда «Микроэлектроника Плюс» МЧЖ ҳамкорликда амалга оширилаётган автобусларда тўловларни автоматлаштириш синов лойиҳаси Мустақилликнинг 26 йиллиги байрами арафасида Гулистон шаҳри аҳолисига байрам туҳфаси сифатида тақдим этилди ва улар томонидан жуда илиқ кутиб олинди.
«Микроэлектроника Плюс» МЧЖ йўловчи транспорт, хусусан темир йўл соҳасида автоматлаштирилган тизимларни лойиҳалаштириш ва амалиётга жорий этиш бўйича 8 йилдан ортиқ тажрибага ва ижобий натижага эга маҳаллий корхона.
Мазкур лойиҳа доирасида Гулистон шаҳридаги иккинчи, тўртинчи ва бешинчи мавзеларга қатновчи Isuzu русумидаги 10 та автобуслар махсус қурилмалар (валидатор) билан жиҳозланди. Натижа эса ҳам ажойиб, ҳам жуда қулай.
Аҳолига яратилган қулайликнинг энг аввалида йўл ҳақини нақд пулсиз тўлашни таъкидлаб ўтиш жоиздир. Эндиликда транспорт тўлов картасини сотиб олиш ва уни кейинчалик тўлдириб бориш банк пластик картаси орқали, шунингдек электрон тўлов тизимлари орқали амалга ошириш мумкин. Бу эса ўз ўрнида қайтим беришдаги муаммоларни ечади ва тўлов жараёнини бир неча баробарга қисқартиради.
Мисол тариқасида PayNet шохобчасига борган ҳолда ёки телефон орқали Woy-Wo тизимига уланган ҳолда транспорт картаси ҳисобини тўлдириш мумкин. Босқичма-босқич эса барча тўлов тизимлари орқали ҳисобни тўлдириш имкони яратилади.
Ҳайдовчилар ҳам бундай янгилик кириб келишидан жуда хурсанд бўлди. Чунки бунга етарли сабаб ва асос бор. Бундан сўнг йўловчилар тирбанд пайтларда йўлкирани қабул қилиб олиши жуда осонлашади ва қайтим билан ҳам муаммолар юзага келмайди. Ҳайдовчи асосий эътиборининг йўлга қаратилиши эса барчанинг хавфсизлигини таъминлашга хизмат қилади.
Тўлов карталари учун ҳозирги кунда жаҳонда оммалашиб бораётган NFC технологияси танланган бўлиб, у ўзининг қулайлиги, хавфсизлиги ва тезкорлиги билан тўлов ва объектларга кириш ечимларида кенг қўлланилмоқда.
Шунингдек, мазкур тизим барча автобусларда тўлиқ жорий этиш даврида смартфон қурилмаси ёрдамида тўловларни амалга ошириш имкони яратилади. Бунда смартфон қурилмасига махсус дастур ўрнатилиши ва тизимдан рўйхатдан ўтилишининг ўзи етарли бўлади.
NFC технологиясини қўлловчи смартфонлар валидатор қурилмасига яқинлаштирган ҳолда масофадан тўловни амалга оширилиши мумкин бўлади. Бу турдаги смартфонларнинг ривожланиши ва сонининг ортиб бориши, бундай тўловларнинг оммалашиб боришига замин яратади.
Албатта барча турдаги смартфонлар ҳам бундай интерфейс билан жиҳозланмаган. Ҳаттоки энг замонавий iPhone смартфонлар ҳам NFC технологиясини тўлиқ қўллай олмайди. Шуни инобатга олган ҳолда барча турдаги смартфонларда тўловларни амалга ошириш имконини берадиган электрон QR кодли чипталар жорий этилди. Бу электрон чипталар йўловчи ҳар тўлов амалга ошириш даврида алоҳида ажратилади ва улар такрорланмайди.
Мазкур ечимга кўра тизимга уланган барча автобуслар мобил алоқа тармоғи орқали алоқани амалга оширади. Республика ҳудудларида мобил алоқа тармоғи ҳолатини инобатга олган ҳолда ҳамда кутилмаган вазиятларни олдини олиш мақсадида, автобуслар нафақат онлайн режимида, шу билан бирга офлайн режимида ҳам йўловчилардан тўловларни қабул қилиш механизми ишлаб чиқилди. Бу эса тизим узлуксиз ишлашини таъминлайди ва ишончлилигини оширади.
Изоҳ (0)