Хусусийлаштирилган корхоналарга кўмаклашиш жамғармаси 20 млрд сўмлик кредит линияларини очиш тўғрисидаги келишувни имзолади

Давлат рақобат қўмитаси ҳузурида Хусусийлаштирилган корхоналарга кўмаклашиш жамғармасини ташкил этилиши кичик тадбиркорлик субъектлари лойиҳаларини қўллаб-қувватлашда ишлатиладиган молиявий дастаклар кўламини янада кенгайтирди. Бу ҳақда «Дарё»га қўмита ахборот хизмати хабар бермоқда.

Жамғарма аввал хусусийлаштирилган, лекин фаолият кўрсатмаётган ёки кам қувват билан ишлаётган объектлар негизида инвестициявий лойиҳаларни қўллаб-қувватлаш мақсадида «Ўзсаноатқурилишбанк» ва «Туронбанк» билан умумий қиймати 20 миллиард сўмни ташкил этган кредит линияларини очиш тўғрисида бош келишувни имзолади.

Тижорат банклари лойиҳаларни амалга оширадиган мижозларига жамғарма ресурслари ҳисобидан Марказий банкнинг қайта молиялаштириш ставкасидан ошмаган ставкада уч йилгача муддатга кредит беради.

Жамғарма тижорат банкларига кичик тадбиркорлик субъэктлари ҳисобланган мижозларига кредит берганда Марказий банкнинг қайта молиялаштириш ставкасидан ошган фоизли харажатларни қоплашга субсидиялар ҳам ажратади.