Тошкент метросидан фойдаланувчиларига замонавий ечимларни инобатга олган ҳолда қўшимча қулайлик яратиш мақсадида, «Тошкент Метрополитени» УК ва «Микроэлектроника Плюс» МЧЖ ҳамкорликда метрополитен хизматларидан фойдаланишда йўлкира ҳақини тўлашнинг автоматлаштирилган тизимини жорий этиш лойиҳаси амалга оширилмоқда.
«Микроэлектроника Плюс» МЧЖ йўловчи ташиш транспорти, хусусан темир йўл тизимида автоматлаштирилган тизимларни лойиҳалаштириш, яратиш ва амалиётга жорий этиш бўйича кўп йиллик тажрибага ва талай ижобий натижаларга эга маҳаллий корхоналардан биридир.
Лойиҳа бошланганига 2 йил бўлган бўлса, ушбу даврда дунёнинг ривожланган шаҳарларининг транспорт тизимлари ўрганиб чиқилди ва маҳаллий инженер ва дастурчилар томонидан миллий ечим ишлаб чиқилди.
Лойиҳанинг дастлабки босқичида «Мустақиллик майдони» метро бекати тест синовлари тариқасида махсус турникет ва бир марталик чипта сотувчи автоматлар билан жиҳозланди. Синов натижалари ва аҳолининг таклифлари асосида тизим янада такомиллаштирилади ва метронинг барча бекатлари тўлиқ тизимга уланади.
Тизим тўлиқ жорий этилгандан сўнг йўлкира ҳақини тўлашнинг бир неча қулай усуллари амалиётга жорий этилади, жумладан:
Бир марталик метро чиптаси ёрдамида метрога кириш. Бундай чипталар ҳар бир метро бекатининг кириш қисмида ўрнатилган махсус чипта сотувчи қурилмалар орқали нақд пул ва пластик карта ёрдамида сотиб олинади. Чиптада QR код (Quick Response Code — тезкор жавоб берувчи код) тасвирланган бўлиб, уни турникет сканерига кўрсатиш етарли бўлади.
Ҳозирги кунда, NFC (Near Field Communication — яқин масофадаги алоқа) карталари ёрдамида объектга кириш ва тўловларни амалга ошириш дунёда оммалашиб бормоқда. Метрога киришда ҳам мазкур технологияни қўлловчи карталардан фойдаланиш имкони яратилмоқда. Ушбу карталар бир маротаба харид қилинади ва ҳисобини тўлдириш орқали доимий фойдаланиш мумкин.
Яна бир инновацион қулайлик, бу тўловларни смартфон қурилмаси ёрдамида амалга оширишдир. Ўзбекистон аҳолисининг 2/3 қисмидан ортиғи мобил алоқадан фойдаланувчилар эканлигини инобатга олсак бу жуда оммабоп ечимдир. Бунинг учун смартфон қурилмасига махсус дастур ўрнатилади ҳамда QR код ёки NFC боғланиш орқали тўловлар ўтказилади.
Ушбу тизимни жорий этиш натижасида яратиладиган қулайликлардан яна бири, энди метрога кириш воситасини (жетон ёки ойлик йўл чиптасини) харид қилиш учун махсус ажратилган жойга бориш шарт эмас. NFC карта ва йўловчининг тўлов тизимдаги балансини барча турдаги электрон тўлов тизимлари ёрдамида тўлдириш имкони мавжуд.
Мазкур ўзгаришлар амалга оширилгандан сўнг, NFC карталар ойлик йўл чипталари ўрнини босса, пластмасса жетонлар вазифасини эса QR кодли билетлар бажаради.
Изоҳ (0)