Украина ҳуқуқ-тартибот органлари Грузия собиқ президенти ва Одесса вилояти маъмуриятининг собиқ раҳбари Михаил Саакашвилининг укаси Давидни қўлга олди. Бу ҳақда мамлакат ички ишлар вазири Илья Кивнинг собиқ маслаҳатчиси «112 Украина» нашрига берган интервьюсида маълум қилди, деб хабар берди «Корреспондент.net».
«Михаил Саакашвилининг укаси мамлакатда қолиш тартибини бузганлиги учун қўлга олинди. Иммиграцион хизмат ва полиция уни қўлга олди ҳамда депортация қилиб юборишга тайёргарлик кўрмоқда», — деди у.
Укаси қўлга олинганлиги ҳақидаги маълумотни Михаил Саакашвилининг ўзи ҳам тасдиқлади.
«Бугун тонгда укам Давид Саакашвили Киевдаги уйидан чиққанида ИИВ вакиллари томонидан қўлга олинган ва номаълум йўналишда олиб кетилган», — дея сиёсатчи Facebook’даги саҳифасида ёзув қолдирди.
Эслатиб ўтамиз, 26 июль куни Михаил Саакашвилининг Украина фуқаролигидан маҳрум қилинганлиги маълум бўлганди. Бунга у ўз ҳужжатларида Грузия томонидан сиртдан ҳибсга олиниш бўйича қарорни кўрсатмаганлиги сабаб бўлган.
Шунингдек, Михаил Саакашвили 10 сентябрь куни Краковец божхона пункти орқали Украинага қайтишини маълум қилди.
Изоҳ (0)