Алишер Усмонов жорий йил бошидан бери бойлигини 1,47 миллиард долларга ошириб олди

2017 йилнинг саккиз ойи давомида россиялик миллиардерларнинг умумий бойлиги 17,099 миллиард долларга ортди. Бу ҳақда Bloomberg агентлиги томонидан эълон қилинган Bloomberg Billionaires Index (BBI) маълумотларга асосланиб, «РИА Новости» хабар берди.

Индекс миллиардерларнинг улуши бўлган компанияларнинг ҳисобот маълумотларига ва акцияларининг қийматига асосланган ҳолда ишлаб чиқилади.

Индексга кўра, Россиядаги энг бой одам «Северстал»нинг асосий акционери Алексей Мордашов бўлиб, унинг бойлиги жорий йил бошидан бери 1,49 миллиард долларга ортиб, умумий бойлиги 18,4 миллиард долларни ташкил этган. Иккинчи ўринни «Норильский никель» компанияси президенти Владимир Потанин эгаллаган бўлиб, унинг бойлиги 905 миллион долларга кўпайган, натижада унинг умумий бойлиги 17,5 миллиард долларни ташкил қилган. Ундан кейинги поғонани январь ойидан бери бойлиги 3,47 миллиард доллага ортиб, умумий бойлиги 16,6 миллиард долларга етган Новолипецк металлургия комбинатининг директорлар кенгаши раиси Владимир Лисин эгаллаган. Таъкидлаш керакки, Лисиннинг бойлиги август ойида 1,6 миллиард долларга ортган ва у «Ренова» компаниясининг асосий эгаси ва директорлар кенгаши раиси Виктор Вексельбергни ортда қолдирган.

Вексельберг 2017 йилнинг январь—август ойларида бойлигини 1,41 миллиард долларга кўпайтириб, жами 15,6 миллиард доллар билан тўртинчи ўринни эгаллади. «Новатэка» раҳбари Леонид Михельсоннинг бойлиги йил бошидан бери 2 миллиард долларга камайиб, 15,3 миллиард долларга тушиб қолди. «Альфа-групп» консорциуми акционери Михаил Фридман бойлигини 1,32 миллиард долларга кўпайтириб, давлатини 14,6 миллиард долларга етказди. USM Holdings асосчиси Алишер Усмоновнинг капитали эса йил бошидан бери 1,47 миллиард долларга ортиб 14,4 миллиард долларга етди.

Ундан кейинги поғонани «Лукойл» раҳбарлари Вагит Алекперов ва Михаил Прохоров (иккаласининг бойлиги 11,3 миллиард долларга баҳоланди) эгаллади. Шу билан бирга, йил бошидан бери Алекперовнинг капитали 693 миллионга камайган бўлса, Прохоровники 470 миллион долларга ортган.

Volga Group компанияси раҳбари Геннадий Тимченконинг бойлиги 1,9 миллиард долларга камайиб, умумий бойлиги 9,57 миллиард долларга тушиб кетди.