Ўзбекистон Президенти Шавкат Мирзиёев қарори билан «Хавфсиз шаҳар» ягона аппарат-дастурий комплексини босқичма-босқич яратиш Дастури тасдиқланди. Лойиҳа амалга оширилишини мувофиқлаштирувчи комиссия тузилди ва уни бош вазир Абдулла Арипов бошқарди, дея хабар беради «Газета.uz».
«Хавфсиз шаҳар» комплекси ички ишлар, давлат органлари ва уларнинг муассасалари ахборот, видеокузатув, қонун бузилиш ҳолатларни қайд этиш, қўриқлаш объектлари, юзага келиши мумкин бўлган таҳдидларга чора кўриш ва огоҳлантириш, таҳлилий «ақлли датчик»лар тизимлари, шунингдек, қонун бузилишларининг олдини олишга қаратилган бошқа ахборот тизимлари, навбатчи-диспетчерлик марказлари ва маълумотларни қайта ишлаш марказларини интеграция қилишга қаратилган.
Бу вазифалар билан Ахборот технологиялари ва коммуникацияларини ривожлантириш вазирлигининг номи Ахборот хавфсизлиги ва жамоат тартибини таъминлашга кўмаклашиш марказига ўзгартирилган Ахборот хавфсизлигини таъминлаш маркази шуғулланади. Вазирликда «Хавфсиз шаҳар» комплексини яратиш бўйича лойиҳани ўз вақтида ва кенг миқёсида, сифатли амалга оширишга масъул ўринбосар лавозими жорий қилинади.
«Хавфсиз шаҳар» ягона аппарат-дастурий комплексини яратиш ва ривожлантириш концепцияси 1 октябргача тасдиқланиши лозим. Лойиҳанинг биринчи, тажрибавий босқичи 2017—2019 йилларга мўлжалланган ва Тошкент шаҳрида ишга туширилади.
Иккинчи босқичда (2019—2021 йиллар) «Хавфсиз шаҳар» вилоят марказлари ва йирик шаҳарларда жорий этилади. Учинчи босқичда (2021—2023 йиллар) комплекс бутун мамлакатни қамраб олади.
Изоҳ (0)