Forbes россиялик мансабдорларнинг энг бадавлат рафиқалари рейтингини тузди

Forbes Woman журнали 2016 йилдаги россиялик мансабдорларнинг энг бадавлат рафиқалари рейтингини тузди, деб ёзади «РБК». Маълум бўлишича, баъзи ҳолларда рафиқалар эрларига нисбатан юз марта кўпроқ даромад олади.

Рейтингда биринчи ўринни 2,351 миллиард рубль даромад билан Татаристон президентининг хотини Гулсина Минниханова эгаллади. У спа-салон, меҳмонхона, ресторан ва фитнес-клубларни ўз ичига олувчи бир нечта компанияларга эгалик қилади. Татаристон президенти Рустам Миннихановнинг даромади эса 2016 йилда 7,5 миллион рублни ташкил этди.

Рейтингда иккинчи ўринда Улан-Удэ шаҳар кенгаши депутатининг рафиқаси Раиса Бредний жойлашди. Унинг 2016 йилдаги даромади 1924 миллиард рублга тенг бўлди, бу эри Вадим Бреднийнинг даромади (903 миллион рубль)дан икки карра кўп демакдир. Гап шундаки, Раиса Бредний 40 дан ортиқ озиқ-овқат дўконлари, гўштни қайта ишлаш фабрикаси, балиқ заводи, кондитер цехи, ресторан ва фитнес-марказидан иборат «Титан» тармоғини ўз ичига олувчи шу номли компаниянинг бошқарувчи директоридир. Вадим Бреднийнинг ўзи эса — «Титан» гуруҳи раҳбари.

Учинчи поғонани Брянск вилояти губернаторининг турмуш ўртоғи Олга Богомаз банд этди, у картошка ишлаб чиқарувчи «Богомаз» фермер хўжалиги эгадоши. 2016 йилда унинг даромади 864 миллион рублни ташкил қилди ва эрининг даромадидан 240 баробар ошиб кетди.

Рейтингнинг тўртинчи ва бешинчи ўринларини тегишли равишда «Ростех» бош директорининг рафиқаси Екатерина Игнатова (848 миллион рубль, асосий даромад манбаи — МФК банки акциялари) ва Давлат думаси депутати Александр Николаевнинг хотини Елена Некрасова (646 миллион рубль, «Лидер Групп» холдингига кирувчи компаниялар эгадоши) эгаллади.