Ислом Каримов номидаги Тошкент халқаро аэропортида Истанбулга парвози олдидан Ш.Маматсоева ва А.Умаровнинг божхона ходимларининг кўзини шамғалат қилишга уриниб, 2 турдаги тамаки маҳсулотларини нонлар орасига бекитгани фош бўлди. Бу ҳақда Давлат божхона қўмитаси ахборот хизмати хабар берди.
Шу тариқа, божхона ходимларининг оғзаки сўрови пайтида маълум қилмасдан туриб ҳамда йўловчи божхона декларациясида қайд этмасдан Ш.Маматсоева 560 қути, А.Умаров эса 500 қути тамаки маҳсулотларини яширинча олиб чиқишга уринган пайтида тўхтатиб қолинди.
Шунингдек, уддабуронлар сигаретларни картон қутилардаги печенелар орасига ҳамда пойабзаллар ичига ҳам яширган.
Бундан ташқари, «Тошкент—Истанбул» рейси бўйича парвози олдидан фуқаролар И.Қўлдошева ва Х.Маноновалар ҳам тамаки маҳсулотларини божхона назоратидан четлаб, олиб чиқмоқчи бўлишганда тўхтатиб қолинди.
Божхона ходимларини чалғитишга уринган И.Қўлдошева 700 қути, Х.Манонова эса 880 қути тамаки маҳсулотларини қуруқ чой қадоқлари ичига бекитишган.
Ҳозирда ушбу ҳолатлар юзасидан божхона текширувлари ва суриштирув жараёнлари давом эттирилмоқда.
«Тошкент-Аэро» ихтисослаштирилган божхона комплекси ходимлари томонидан ҳуқуқни муҳофаза қилувчи бошқа идоралар вакиллари билан ҳамкорликда жорий йилнинг ўтган даври мобайнида аниқланган 100 га яқин божхона қоидабузарликлари натижасида қиймати салкам 200 миллион сўмлик 39,8 минг қути тамаки маҳсулотларининг ноқонуний олиб ўтилишига чек қўйилди.
Изоҳ (0)