Ўзбекистон Бош прокуратураси мамлакатдаги Маъмурий ислоҳот концепцияси лойиҳасини тайёрлади, у жамоатчилик муҳокамаси учун Normaтив ҳуқуқий ҳужжатлар муҳокамаси порталига жойланди, деб ёзади «Газета.uz».
Ҳужжатда таъкидланишича, давлат бошқарувининг амалдаги моделини мукаммаллаштирмасдан ва ушбу соҳада мавжуд бўлган муаммоларни ҳал қилмасдан туриб, 2017—2021 йилларда Ўзбекистонни ривожлантириш бўйича Ҳаракатлар стратегиясида кўрсатилган вазифаларни амалга ошириш мумкин эмас.
Мавжуд муаммолар қаторида қуйидагилар тилга олинган:
ўтиш босқичида самарали бўлган, бозор алоқалари ва тез ўсувчи хусусий сектор, марказлашмаган тизимга босқичма-босқич ўтиш ва давлат бошқарувини демократлаштириш шароитларида ўз долзарблигини йўқотган «қўлда» бошқариш ва директив режалаштириш услублари;
республика давлат бошқаруви органларининг ҳаддан ташқари марказлашгани ва жойлардаги давлат ҳокимияти органларининг институционал, шунингдек, ташкилий-штатли заифлиги;
давлат бошқаруви органларига юкланган вазифа ва функциялар бажарилиши, шунингдек, давлат хизматлари кўрсатилиши даражасининг аҳоли ва бизнес талабларига мос келмаслиги;
иқтисодиёт тармоқлари, ижтимоий соҳанинг давлат томонидан ҳаддан ташқари бошқарилиши, ўз-ўзини бошқариш институтининг ривожланмаганлиги ва бошқалар.
«Давлат бошқаруви тизимида мавжуд камчиликлар жамоатчиликнинг ўсиб бораётган талабларини етарлича қондириш, жойларда тўпланиб қолган муаммоларни ечиш, ҳудудлар иқтисодиётининг қолоқ ривожланишини ҳал қилиш, ва одамлар ҳаётида кутилаётган ижобий ўзгаришларга эришишга имкон бермайди», — дейилади концепция лойиҳасида.
Юзага келган вазиятда, дейилади ҳужжатда, давлат бошқаруви тизимини тубдан такомиллаштириш талаб этилади.
Лойиҳада бундай такомиллаштириш нималарни кўзда тутиши ва қандай натижаларга олиб боришига батафсил тўхталиб ўтилган.
Изоҳ (0)