Июль бошида Чеченистон раҳбари Рамзан Қодиров ажрашган эр-хотинларни яраштириш кераклигини айтган эди, деб ёзади Meduza. У нотўла таркибли оилаларнинг фарзандлари экстремистлар таъсирига кўпроқ мойил эканлигини таъкидлади.
Эр-хотинларни яраштириш билан махсус комиссиялар диний арбоблар иштирокида шуғулланади. Ажрашган эр-хотинларни никоҳ-оила муносабатларини уйғунлаштириш штабига алоҳида-алоҳида таклиф қилишади ва ярашишга чақиришади. Баъзи ҳолатларда оқсоқолларни ҳам ишга солишади. Баъзан хотин иккинчи марта уйланиб бўлган эрига қайтади ва унга иккинчи хотин бўлади.
21 август куни Чеченистон телевидениеси 948 та оила қайта тикланганини маълум қилди. Бундай муваффақият «Рамзан Қодиров томонидан шундай пухталик билан ишлаб чиқилган ушбу дастурни амалга оширишда ҳеч қандай қийинчиликлар юзага келмаётганлиги» билан изоҳланди.
Грознийда яшовчи аёллардан бирининг айтишича, ҳукумат ярашишни таклиф қилган пайтда асосий далил сифатида Қодировнинг раъйини келтиради. «Яъни сиз рад жавоби берсангиз, нафақат дин қоидаларига, балки Қодировнинг раъйига ҳам қарши бораётган бўласиз. Бу босим ўтказишнинг ана шундай шакли», — деди у.
Чеченистонликлар Рамзан Қодировнинг собиқ турмуш ўртоқлари билан ярашишга даъватини турлича қабул қилмоқда. Баъзи аёллар эрлари билан қолган фарзандлари билан кўришиш учун қайтмоқда. Телевидение бу ҳақда сюжетлар тасвирга олмоқда. Бошқалар эса бунга кескин қарши чиқмоқда.
Изоҳ (0)