Чили ҳукумати Кокимбо ҳудудидаги мис ва темир рудаси қазиб олиш бўйича лойиҳадан воз кечди. Бунга лойиҳанинг ҳудуд экологияси ва Гумбольдт пингвинлари популяциясига зарар етказиш хавфи сабаб бўлган. Бу ҳақда «Интерфакс» хабар берди.
Чили атроф-муҳитни муҳофаза қилиш вазири Марсело Менанинг сўзларига кўра, Dominga лойиҳаси учун ариза топширган Andes Iron компанияси тоғ қазилма ишлари натижасида юзага келиши мумкин бўлган оқибатларни бартараф этиш бўйича етарлича кафолат бера олмаган.
Andes Iron компанияси бир йилда 12 миллион тонна темир рудаси ва қарийб 150 минг тонна мис рудаси қазиб олишни режалаштирган эди.
Кокиимбо ҳудудида Гумбольдт пингвинларининг катта популяцияси яшайдиган қўриқхона жойлашган. Улар «хавф остида» қолган деб тан олинган ва уларга хавф солувчи омиллар бартараф этилмаса, турга йўқолиб кетиш хавфи таҳдид қилмоқда. Дунёдаги Гумбольдт пингвинларининг сони 12 мингтадан ошмайди.
Изоҳ (0)