2017 йил 18 август куни соат 22:00 ларда «Қамчиқ» қидирув-қутқарув отряди навбатчи диспетчери томонидан олинган маълумотга кўра, А-373 «Тошкент—Ўш» автомобиль йўлининг «Тошкент—Водий» йўналишида йўл транспорт ҳодисаси содир бўлди, деб хабар берди Фавқулодда вазиятлар вазирлиги матбуот хизмати.
«Тошкент—Водий» йўналиши бўйича ҳаракатланиб кетаётган Shacman русумли юк автомашинаси қарама-қарши йўналишга ўтиб кетиб, шу йўналишда келаётган Isuzu русумли юк машинаси, Damas русумли енгил автомобили ва Hyundai русумли автосамасвали иштирокида йўл транспорт ҳодисасини юзага келтирди. Мазкур ҳолат ўз ўрнида автотранспортлар қатновининг тўхтаб қолишига сабаб бўлган.
Тезкор хабар олингач, «Қамчиқ» қидирув-қутқарув отряди қутқарувчилари воқеа жойига етиб борган.
«Қамчиқ» қидирув-қутқарув отрядининг қутқарувчилар гуруҳи, ЙҲХ ходимлари ва тез ёрдам шифокорлари, қолаверса, йўловчилар томонидан жабрланганларга биринчи тиббий ёрдам кўрсатилиб, улар Поп тумани марказий шифохонасига жўнатилган.
Ағдарилган Shacman ва Isuzu юк автомашиналарини махсус автотехникалар ёрдамида тик ҳолатга келтириб, «Шеробод» йўл-патруль масканининг жарима майдончасига эвакуация қилинди.
Изоҳ (0)