Хорижга чиқиш паспортини расмийлаштириш жараёни максимал даражада автоматлаштирилади

Хорижга чиқиш паспортини расмийлаштириш жараёни максимал даражада автоматлаштирилади. Бу ҳақда Ўзбекистон Вазирлар Маҳкамаси ҳузуридаги Давлат персонализация маркази директори Нажмиддин Тўрахўжаев «Газета.uz» нашрига маълум қилди.

«Биометрик паспорт тизими базасида лойиҳанинг барча иштирокчилари — Ташқи ишлар вазирлиги, барча ҳудудий ички ишлар бўлинмаларини қамраб олувчи улкан инфратузилма яратилди. Биометрик паспорт тизими базасида жисмоний шахслар базаси яратилди, бу базадан электрон ҳукумат тизими фойдаланади. Электрон ҳукумат тизимида рўйхатдан ўтган фойдаланувчи мажбурий тартибда бу базада ҳам идентификациядан ўтади. Худди шундай тизим маълумотларни тўплаш пункти — миграция ва фуқароликни расмийлаштириш ҳудудий бўлинмаларида ҳам бўлади», — деди у.

Нажмиддин Тўрахўжаевнинг айтишича, амалдаги тизимда хорижга чиқиш учун рухсат берувчи стикерлар Тошкентда туман бўлинмаларида, вилоятларда эса — фақат вилоят марказларида берилади. Хорижга чиқиш паспортини олиш учун эса доимий рўйхатда турган жой бўйича мурожаат қилиш мумкин, барча масалалар ўша ерда ҳал қилинади.

«Маълумки, авваллари ҳужжатбозлик ишлари кўп эди. Энди ‘бир дарча’ тизими киритилмоқда — келасиз ва тўлдирилган анкетани топширасиз. Ҳаммаси жойида текширилади, ҳеч нарсани тўплаш керак бўлмайди, давлат органи вакилининг ўзи бу билан шуғулланади», — дея таъкидлади у.

«Аризаларни интернет орқали топшириш масаласи ишлаб чиқилмоқда. Тизимга электрон навбатлар ва электрон тўловлар киритилади… Лойиҳани амалга ошириш учун Давлат персонализация маркази тизимни ишлаб чиқиш, жорий қилиш, ҳужжатлар намуналарини тайёрлаш, буклетларни буюртма қилиш билан боғлиқ ташкилий-техник тадбирларни ўтказиши керак. 2018 йил 1 декабргача ҳаммаси тайёр бўлиши керак», — деди Давлат персонализация маркази директори.

Хорижга чиқиш паспортини олиш учун белгиланган шаклдаги анкета керак бўлади. Паспорт учун ариза беришнинг электрон усули ишлаб чиқилмоқда, фақат бармоқ излари ва фотосуратлар керак бўлади. Умуман, паспорт олиш тизими максимал даражада соддалаштирилади.

Хорижга чиқиш паспортининг нархи ҳужжат таннархидан келиб чиқади. «Мамлакат молия-иқтисодиёт блоки ҳисоб-китобларни амалга оширади. Энг кам ойлик иш ҳақидан кўп бўладими, кам бўладими? Менимча кўпроқ бўлади.

Биз тажрибаларини ўрганган мамлакатларда хорижга чиқиш паспортининг нархи — 50—70 доллардан зиёд. Хорижга чиқиш паспортларини тайёрлаш Ўзбекистонда амалга оширилади, барча технологиялар маҳаллийлаштирилган. Биз фақат чиплар ва операцион тизимини сотиб оламиз, аммо ишлаб чиқиш маҳаллий бўлади.

Навбатлар бўлмайди. Хорижга чиқиш паспорти керак бўладиган фуқароларнинг тахминий сони ҳисоблаб чиқилган. Эҳтимол, биринчи кунлари қандайдир шов-шув бўлиши мумкин. Аммо бизда бор ускуна ва технологиялар уддалайди», — деди у.

Эслатиб ўтамиз, Ўзбекистонда 2019 йил 1 январдан хорижга чиқиш учун алоҳида биометрик паспортлар жорий этилади. Чет элга чиқиш рухсатномаси (стикер)ни расмийлаштириш тартиби ҳам шу санадан бошлаб бекор қилинади.