Ўзбекистон Мудофаа вазирлигида 17 август куни Қозоғистон мудофаа вазири Сакен Жасузоқов бошчилигидаги делегация билан учрашув бўлиб ўтди. Бу ҳақда ЎзА хабар бермоқда.
«Мамлакатимизда Қозоғистон билан ўзаро манфаатли алоқаларни ривожлантиришга алоҳида эътибор қаратиб келинмоқда ҳамда дўстона муносабатлар юксак қадрланади. Давлатларимиз ўртасидаги ҳамкорлик бутун Марказий Осиё минтақасининг хавфсизлиги ва барқарор ривожланишини таъминлашда муҳим аҳамият касб этади», — деб ёзади ЎзА.
Хабар беришларича, учрашувда Ўзбекистон билан Қозоғистон ўртасида ҳарбий, ҳарбий-техник ва ҳарбий таълим йўналишларидаги ҳамкорликнинг бугунги ҳолати хусусида сўз юритилган. Томонлар минтақадаги ҳарбий-сиёсий вазият юзасидан ҳам ўзаро фикр алмашди.
Тадбирда икки мамлакат Мудофаа вазирликлари ўртасидаги ҳамкорлик режаси тасдиқланди. Мазкур ҳужжатга мувофиқ келгусида мудофаа соҳасидаги алоқаларни янада ривожлантириш кўзда тутилган.
Изоҳ (0)