Бухоро ва Самарқанд шаҳарларидаги туризм ҳудудлари тажрибаси асосида Урганч, Тошкент шаҳарлари ва Фарғона вилоятида туризм ҳудудлари ташкил этилади. Ўзбекистон Президенти томонидан 16 августда имзоланган қарорда бу ҳақда назарда тутилган, деб ёзади UZ24.
Ҳужжатга кўра, Тошкент вилояти Бўстонлиқ туманида тоғ кластерлари босқичма-босқич ташкил қилинади.
Ташкил этилаётган туризм ҳудудлари ва тоғ (тоғолди) туризм кластерларига чет эл сармоядорларини жалб қилиб, шунингдек, янги меҳмонхоналар қуриш учун Ўзбекистонга етакчи меҳмонхона брендлари таклиф қилинади ёки мамлакатдаги меҳмонхона хўжаликларини уларнинг бошқарувига топширилади.
Андижон вилояти Хонобод шаҳрида дам олиш ҳудудлари, Жиззах вилояти Фориш ва Арнасой туманларида Айдар-Арнасой кўллари соҳилида бешта янги замонавий дам олиш ҳудудлари, Қашқадарё вилояти Шаҳрисабз ва Қарши шаҳарларида тўрт юлдузли меҳмонхоналар, Тошкент вилояти Бўстонлиқ тумани Чимён тоғ массивида меҳмонхона мажмуаси барпо этилади. Шунингдек, Навоий вилоятида Тўдакўлнинг жанубий соҳилида ички туризм ва Айдаркўл соҳилларида хорижлик туристлар учун пляжлар ташкил этилади.