17 август куни Тошкентда Шавкат Мирзиёев раислигида ички ишлар органлари тизимида олиб борилаётган ишларнинг аҳволи, муаммолар ва келгусидаги вазифаларга бағишланган видеоселектор йиғилиши бўлиб ўтди. Бу ҳақда Президентнинг расмий сайтида маълумот берилди.
Унда Олий Мажлис палаталари раҳбарлари, бош вазир ва унинг ўринбосарлари, Президентнинг давлат маслаҳатчилари, қатор вазирлик идоралар раҳбарлари, шунингдек, видеоселектор орқали Қорақалпоғистон Жўқорғи Кенгеси раиси, вилоятлар ва Тошкент шаҳар ҳокимлари, уларнинг ёшлар ва хотин-қизлар масалалари бўйича ўринбосарлари, жамоат ташкилотлари, ички ишлар органларнинг таркибий бўлинмалари мутасаддилари иштирок этди.
Йиғилишда ички ишлар органлари тизимида олиб борилаётган ишларнинг аҳволи, муаммолар ва келгусидаги вазифалар муҳокама қилинди.
Ҳисобот даврида вояга етмаган шахслар томонидан жиноят содир этиш 12,8 фоиз, аёллар жиноятчилиги 3,84 фоиз камайишига эришилди.
Маҳаллаларда жиноятчилик ва ҳуқуқбузарликларнинг олдини олиш бўйича жамоатчилик институтлари билан биргаликда олиб борилган кенг қамровли профилактик тадбирлари натижасида 1765 та маҳаллада жиноят содир этилишига йўл қўйилмади.
Жамоат жойларида ўрнатилган 114 мингдан ортиқ видеокузатув мосламаларидан фойдаланган ҳолда Тошкент шаҳри, Андижон, Наманган, Фарғона, Қашқадарё ва Тошкент вилоятларида қарийб 10 минга яқин жиноятлар фош этилди.
Шу билан бирга, таҳлиллар айрим ҳудудларда ишлар хўжакўрсинга, фақат қоғоз учун бажарилаётганини, бунинг оқибатида вазият ижобий томонга ўзгармаётганини кўрсатмоқда.
Давлат раҳбари Ички ишлар вазирлиги раҳбарияти фақат содир этилган жиноятлар ва уларнинг очилиш даражаси ҳақида ахборот бериш билан чекланиб қолаётганини, ҳудудларда ўтказилган профилактик тадбирлар, уларнинг самарадорлигини танқидий таҳлил қилиш, жойларда ички ишлар органлари фаолиятини мунтазам мувофиқлаштириб бориш каби масалаларга жиддий эътибор бермаётганини кўрсатиб ўтди.
Айрим ҳудудларда ҳуқуқбузарликлар профилактикаси ва жиноятларни барвақт аниқлаш ишлари қониқарли эмас. Масалан, республика бўйича жиноятчилик кўрсаткичлари камайган, лекин Самарқанд вилоятида ошиб кетган. Бухоро, Навоий, Фарғона вилоятлари ва Қорақалпоғистонда хотин-қизлар томонидан жиноят содир этиш ҳолатлари кўпайган.
Жойларда профилактика масаласига етарлича эътибор берилмаяпти. Масалан, Самарқанд вилоятида содир этилган 49 та қотилликдан 14 таси, Жиззах вилоятида ўнтадан тўрттаси, Навоий вилоятида ўнтадан учтаси, Қашқадарёда 30 тадан олтитасининг олдини олиш учун тўлиқ имкониятлар мавжуд бўлган — маҳалла фаоллари ва профилактика инспекторлари муайян жиноят эҳтимолидан бохабар бўлса-да, бирор чора кўрмаган.
Мажлисда Ички ишлар вазирлиги ва Бош прокуратура мутасаддиларининг ҳисоботлари тингланди.
Сўзга чиққанлар Ички ишлар вазирлиги ва унинг ҳудудий бўлинмалари муҳокомадан ўзига тегишли хулоса чиқариб олиб, мажлисда кўтарилган ва соҳадаги мавжуд бошқа камчиликларни бартараф этиш йўлида астойдил саъй-ҳаракат қилишларини таъкидлади.
Изоҳ (0)