Андижон ва Фарғонада эҳтиёжманд оилаларга янги уйлар топширилди

Андижон вилоятида эҳтиёжманд оилалар, жисмоний имконияти чекланган фуқароларга Президент совғаси — янгиланган намунавий лойиҳалар асосида бунёд этилган уй-жойлар тантанали топширилди. Бу ҳақда ЎзА хабар бермоқда.

Балиқчи туманида яшовчи Азизбек Тоштанов, Пахтаобод тумани Сойбўйи маҳалласидан Муносибхон Холдинова, жалақудуқлик Умиджон Деҳқонов, Булоқбоши туманида яшовчи Иродахон Ҳамдамова, пахтаободлик Адолатхон Абдураҳмонова, марҳаматлик Шаҳноза Адҳамова, шаҳрихонлик Озодбек Худойбердиев, улуғнорлик Гулнора Ҳамдамова, қўрғонтепалик Наргиза Қурбонова, Ҳусан Содиқовларга Президент совғаси — янги уйлар калитлари топширилди, тадбирларда Андижон вилояти ҳокими Шуҳрат Абдураҳмонов сўзга чиқди.

Ўғлим Азизбек ҳам, келиним Дилдорахон ҳам II гуруҳ ногирони. Тўрт фарзандим бор, иккови уйланган. Ҳозир 4 сотихли ҳовлида уч оила, 10 жон яшаймиз. Шу торгина ҳовлида кенжа ўғлим тадбиркорлик билан шуғулланиб, товуқ боқади.

Анча қийналиб қолган эдик. Шунинг учун Президентимизнинг виртуал қабулхонасига уй-жой олиш масаласида мурожаат қилган эдик, мана бугун Арчазор маҳалласида барпо этилган янгиланган лойиҳадаги 2 сотихли уйлардан бири ўғлим Азизбекка ажратилди. Бунинг устига уйнинг бошланғич тўлови Президентимиз томонидан тўлаб берилди.

Биз каби қўли калта, эҳтиёжманд оилаларга кўрсатилаётган алоҳида эътибор ва ғамхўрлик учун давлатимиз раҳбаридан миннатдормиз.

Қимматхон Тоштанова, Андижон вилояти Балиқчи тумани «Авесто» маҳалла фуқаролар йиғинида яшовчи фуқаро

Шунингдек, Фарғона шаҳрида 54 оилага мўлжалланган уй-жой фойдаланишга топширилди. Тадбирда Фарғона вилояти ҳокими Шуҳрат Ғаниев сўзга чиққан.

ЎзАнинг ёзишича, Буфотима Домуллажонова икки фарзанди, келини ва неваралари билан ижарада яшаб келган. Унинг мурожаати қондирилиб, янги хонадон калити топширилди.

Бу гапга тўғриси, аввалига унчалик ишонмадим, туш бўлса керак, деб ўйладим. Очиғи, умидимни йўқотмай, яхши кунларни кутдим, лекин бундай туҳфани хаёлимга ҳам келтирмагандим. Чунки, илгари бунақаси ҳеч бўлмаган-да, эшитмаганмиз ҳам. Йўқ, рост экан. Кўриб турибсиз, мана бу янги уйнинг калити. Мана, энди ўзимизнинг уйга эга бўлдик. Бундай эзгу ишлар бошида турган Президентимиздан миннатдормиз.

Буфотима Домуллажонова, фарғоналик фуқаро

Фарғона шаҳар ҳокими ўринбосари, хотин-қизлар қўмитаси раиси Сайёра Алимованинг сўзларига кўра, шаҳарда бўш турган бинолар қайта таъмирланиб, уй-жойга муҳтож оилаларга берилмоқда. «Жорий йилнинг ўтган даврида бўш турган 2 бино таъмирдан чиқарилиб, 108 оилага берилди», — дейди Сайёра Алимова.