Ўзбекистондаги жазони ижро этиш муассасаларидаги маҳбуслар ўз яқинлари билан видеоконференция орқали кўришиш имконига эга бўлади. Бу имконият Ўзбекистон Президентининг «Озодликдан маҳрум қилиш билан боғлиқ жазони ижро этиш соҳасидаги ички ишлар органлари фаолиятини тубдан такомиллаштириш чоралари тўғрисида»ги қарорида белгиланган.
Қарорга асосан, Ўзбекистон ахборот технологиялари ва коммуникацияларини ривожлантириш вазирлигига босқичма-босқич равишда Жазони ижро этиш бош бошқармаси, унинг таркибий тузилмалари ва муассасаларига ҳимояланган алоқа каналлари орқали видеоконференция тизмини жорий этиш, шу жумладан маҳкумлар ўртасида видеоучрашув ташкил қилиш имкониятларини кўзда тутиш вазифаси юклатилган.
Бундан ташқари, АКТ вазирлиги маҳкумларга қўлланилган интизомий чораларни ҳисобга олишнинг автоматлашган тизмини жорий қилади. Бунда фақат прокуратура органларига ҳисоб маълумотларига ўзгартириш киритиш ҳуқуқи берилади.
Шу билан бирга, вазирликка қамоқда сақланаётган маҳкумлар ва шахслар устидан кузатиш ва назорат қилишнинг замонавий техник воситаларини Жазони ижро этиш бош бошқармаси, унинг таркибий тузилмалари ва муассасаларига жорий қилиш вазифаси юклатилган.
Ўзбекистон ИИВга жорий йилнинг 1 декабрига қадар жазони ижро этиш муассасаларини жазони ўташ, Ўзбекистонда афв этишни амалга ошириш тартиби ва шароитлари ҳақида маълумот берувчи информацион стендлар ва техник воситалар билан жиҳозлаш ва ушбу маълумотларни ўзининг веб сайтига жойлаштириш вазифаси юкланган.
Изоҳ (0)