«Дарё» интернет-нашрида 22 июль куни зангиоталик уй бекаси Дилдора Шарипованинг Зангиота туман юқумли касалликлар шифохонасидаги вазият юзасидан билдирган фикрлари эълон қилинган эди. Уй бекаси шифокорлардан шикояти йўқлигини, бироқ тиббиёт муассасасининг ўзи оғир аҳволда эканини таъкидлаган, хусусан, беморлар қуёш ботганидан сўнг биринчи қават томида ётишга мажбур бўлганини маълум қилган эди.
Мавзуга доир: «Шифокорлари яхши, лекин шифохона абгор». Зангиотадаги бемор болалари томда ётадиган тиббиёт муассасаси ҳақида
Зангиота туманида 400 мингдан зиёд аҳоли истиқомат қилади ва аҳоли сони кундан кунга ошиб бормоқда. Мақолада келтирилган юқумли касалликлар шифохонаси мослаштирилган бинода жойлашган бўлиб, шу кунгача ички имкониятлар ҳисобидан жорий таъмирлаб келинмоқда эди.Айни вақтда, «Дарё» интернет-нашрига Зангиота туман юқумли касалликлар шифохонасининг биринчи қаватида олиб борилаётган таъмирлаш ишлари акс этган фотосуратлар тақдим этилди.Бош шифокорнинг туман раҳбариятига мурожаати асосида, 2017 йилда шифохонанинг биринчи қаватида жойлашган болалар бўлимини реконструкция қилиш ва мукаммал таъмирлаш ишлари учун 100 миллион сўмдан ортиқ маблағ ажратилди ва бугунги кунда бу ишлар жадал олиб борилмоқда. Ушбу бўлимда палаталар бокс шаклида (кириш-чиқиш алоҳида, ҳар бир палатада ювиниш учун алоҳида жой) қайта тузилмоқда.
Туманда юқумли касалликлар шифохонаси битта бўлгани ва ёз фаслида ошқозон-ичак касалликлари кўп миқдорда қайд этилишини инобатга олиб, таъмирлаш даврида шифохонани қисман фаолиятини давом эттириш мақсадга мувофиқ деб топилди. 2018 йилда шифохонанинг мақолада суратлари келтирилган иккинчи қаватида ҳам реконструкция ва таъмирлаш ишларини ўтказиш режалаштирилган.
Туман депутатларининг ҳам шифохонадаги шароитларни яхшилаш бўйича ҳукумат органларига қилган мурожаатларига жавобан, мазкур муассаса учун барча қулайликларга эга замонавий бино қурилиши мақсадга мувофиқ деб топилган бўлиб, ҳозирда лойиҳа ишлари кўрилмоқда.
Мақола муаллифидан шифохонадаги муаммоларга эътиборли бўлгани, тиббий ходимлар хизматига холис баҳо бергани учун миннатдорчилик билдириб, ёзнинг ўта иссиқ кунларида имкониятимиздан ташқари ҳолда етказилган ноқулайликлар учун узр сўраймиз. «Дарё» мухбирларига ҳам аҳолини сифатли тиббий хизмат билан таъминлашга қаратган эътиборлари учун миннатдорчилик билдирамиз.
Мақсуда Варисова, сенатор
Бокс палаталарда кириш-чиқиш йўллари алоҳида бўлади
Палаталар совитиш мосламалари билан жиҳозланмоқда
Палаталар кенг ва ёруғ бўлади, уларга икки нафардан бемор жойлаштирилади
Таъмирлаш ишлари 2017 йил 1 сентябрга қадар якунланади
Изоҳ (0)