Эрдўғон: Араб давлатлари ва Қатар ўртасидаги инқироз давом этишидан ҳеч бир давлат манфаатдор эмас

Араб давлатлари ва Қатар ўртасидаги инқироз давом этишидан ҳеч бир давлат манфаатдор эмас. Бу ҳақда Туркия президенти Ражаб Тоййиб Эрдўғон Саудия Арабистонига учиб кетишдан аввал Истанбулда ташкил этилган матбуот анжуманида маълум қилди, деб хабар беради «ТАСС».

Эрдўғон икки кунлик турнеси доирасида Саудия Арабистони, Кувайт ва Қатарга ташриф буюради.

Туркия етакчисига кўра, инқирозни бартараф этишдаги масъулият айнан Ар-Риёд зиммасида.

Шунингдек, Эрдўғон Туркия воситачилик вазифасини бажараётган Кувайт тутган ўринни юқори баҳолаши, Дохада эса Сурия, Ироқ, Яман ва Ливиядаги вазиятни муҳокама этишини таъкидлади.