Ўзбекистон Президенти Шавкат Мирзиёевнинг топшириғига мувофиқ, Иқтисодиёт вазирлиги ўзининг расмий веб-сайти, оммабоп ижтимоий тармоқлар ҳамда бошқа интернет-нашрларга жойлаштирилган махсус сўров шакли орқали тадбиркорларнинг ўз фаолиятидаги муаммоли масалаларни ечишга ҳамда мамлакат ва ҳудудларда ишбилармонлик муҳити ҳолатини сифат жиҳатидан яхшилашга қаратилган таклиф ва мулоҳазалари ўрганилиб чиқмоқда, деб хабар берди Иқтисодиёт вазирлиги матбуот хизмати.
Бир ҳафтадан кам бўлган муддат ичида тадбиркорлардан қонунчиликдаги номутаносибликлар ҳамда тадбиркорликнинг ривожланиш йўлидаги тизимли муаммоларни бартараф этиш бўйича 80 дан ортиқ таклифлар келиб тушди.
Келиб тушган таклифларнинг кўпчилиги, энг аввало, банк соҳасидаги муаммоларни ечишга қаратилган. Тадбиркорлар банк операциялари бўйича воситачилик ҳақи миқдорининг юқорилигини кўрсатишмоқда.
Шу билан бир қаторда, тижорат банкларига молиявий кўмак сўраб мурожаат қилаётган тадбиркорларга жиддий молиявий юк бўлаётган сабаблар қаторида тижорат банклари томонидан маблағларни конвертация қилиш, аккредитивларни очиш, конвертация қилинган маблағларни чет эллик ҳамкорларнинг ҳисоб рақамларига ўтказиш ва бошқа хизматлар учун абонент тўловлари ҳамда бошқа воситачилик фоизлари ўрнатилганлиги санаб ўтилган.
Кичик бизнес субъектлари вакилларининг кўпчилиги иқтисодий фаолият турларининг умумдавлат таснифлагичига (ИФУТ) ўтиш натижасида вужудга келган муаммоларни қайд этишмоқда. Статистика, солиқ ва молиявий ҳисоботлар учун ИФУТнинг жорий қилиниши натижасида, ХХТУТ бўйича аввал кичик бизнес субъектлари ҳисобланган иқтисодиётнинг айрим тармоқларидаги корхоналар йирик корхоналар тоифасига ўтказилган эди. Натижада, уларнинг кўпчилиги ҳозирги вақтда умумбелгиланган солиқ режимига ўтиб қолишлари ҳамда солиқ юкининг бирданига ошиб кетиши сабабли янги шароитларга аста-секин мослашув босқичларини босиб ўтмасдан йирик корхоналар билан рақобатлашиш имкониятига эга эмас.
Сўров қатнашчиларининг айрим изоҳларида тадбиркорлик субъектлари учун солиқ юкининг ҳануз юқорилигича қолаётганлиги таъкидланмоқда. Хусусан, тадбиркор Ш. Ниязметов томонидан тадбиркорлар иш ҳақининг «конверт»ларда тўлаш ҳолатига барҳам бериш учун хизмат қилиши мумкин бўлган ягона ижтимоий тўлов ставкасини 25 фоиздан 10 фоизга тушириш таклиф этилмоқа, сўров қатнашчиси А. Атажанов эса ходимларнинг чекланган сони 10 кишигача бўлган микрофирмалар учун ягона солиқ тўлови ставкасини 5 фоиздан 3 фоизгача пасайтиришни таклиф этмоқда.
Бундан ташқари, тадбиркорлар корхоналарга қайта ишлаш ва ишлаб чиқариш фаолиятида хом ашё сифатида фойдаланиш учун аҳолидан сут, гўшт, тухум, қишлоқ хўжалиги маҳсулотлари ва бошқа шу каби оддий хом ашё ресурсларини нақд пулли ҳисоб-китобларга харид қилишдаги мавжуд қийинчиликларни кўрсатиб ўтишмоқда.Уларнинг фикрича, корхоналарга аҳолидан нақд пулга хом ашё ва маҳсулотларни харид қилишга рухсат бериш уларнинг норасмий тўловларини камайтириш ва шу орқали маҳсулотлар нархларининг шаклланиши ва уларнинг товар бозорларидаги рақобатбардошлигини ошириш билан бевосита боғлиқ бўлган корхоналарнинг харажатларини мақбуллаштириш имконини беради.
Тегишли чора-тадбирлар қабул қилиш мақсадида ваколатли вазирлик ва идоралар билан биргаликда кўриб чиқиш учун сўровнинг ҳар бир йўналиши бўйича келиб тушаётган барча таклифлар, шунингдекуларнинг тадбиркорлик ривожи учун кутилажак таъсири вазирликнинг тегишли бўлинмалари томонидан синчковлик билан ўрганиб чиқилмоқда.
Изоҳ (0)