Донецк халқ республикаси раҳбари Малороссия давлатининг тузилганини эълон қилди

«Донецк Халқ Республикаси» раҳбари Александр Захарченко янги — Малороссия давлати ташкил этилганини маълум қилди, деб хабар берди Meduza.

Ушбу мамлакат Украина ҳудудида (Қримдан ташқари) ташкил этилди. Малороссиянинг пойтахти этиб Донецк шаҳри эълон қилинди, Киев эса «пойтахт мақомисиз тарихий-маданий марказ» сифатида қолади.

Захарченконинг сўзларига кўра, «мамлакатни қайта яратиш» Украинадаги урушни тугатиш имконини беради. Шунингдек, унинг фикрича «Украина номи ўзини ўзи обрўсизлантирган».

Бундан ташқари Захарченко янги мамлакатда уч йил фавқулодда ҳолат эълон қилишни таклиф этди. Бу вақт давомида сиёсий партияларнинг фаолиятини ман этилади ва айнан шу давр ичида «Одесса, Майдан, Донбассдаги жиноят»нинг тергови бўлиб ўтиши керак.

Александр Захарченконинг журналистларга маълум қилишича, Малороссия «собиқ Украина ҳудудларининг раислари» ташаббуси билан ташкил этилган. Айнан қайси минтақалар раҳбари эканлиги борасида аниқлик киритмади.

Малороссиянинг байроғи сифатида Богдан Хмельницкийнинг байроғи тан олинди… Биз Донецк халқ республикаси Луганск халқ республикаси билан биргаликда (Қримни ҳисобга олмаганда) Украина ҳудудидаги қонуний ҳокимиятни сақланиб қолган ягона ҳудуд деб ҳисоблаймиз.

Александр Захарченко