Қирғизистон президентлигига номзодларни кўрсатиш жараёни жорий йилнинг 1 августига қадар давом этади. Бу ҳақда республикада сайловлар ва референдумлар ўтказиш бўйича Марказий сайлов комиссиянинг ахборот бўлими «ТАСС»га маълум қилди.
«Номзодларни кўрсатиш жараёни 1 августда якунланади, шундан сўнг улар томонидан тақдим этилган ҳужжатлар 10 августга қадар текширилади», — дейилади баёнотда. Ахборот бўлими ходимининг сўзларига кўра, ҳужжатлар текшируви тугагач номзодларни рўйхатга олиш жараёни бошланади. «Улар қирғиз тилидаги билимини текширувчи тест синовини топширишлари, 1 миллион сом (15 минг доллар атрофида) сайлов бадалини тўлашлари ҳамда ўзини қўллаб-қувватловчи камида 30 минг сайловчининг имзосини тўплаши керак», — деб келтиради МСК.
Комиссия маълумотларига кўра, айни вақтга қадар 30 киши ўз номзодини олға сурган. «Улардан беш нафар сиёсий партияларнинг қурултойида олға сурилган бўлса, қолганлари ўз номзодини ўзлари олға сурган», — дейилади Марказий сайлов комиссиясида. Номзодлар орасида амалдаги бош вазир Сооронбай Жээнбеков, ҳукуматнинг собиқ раҳбарлари Темир Сариев ва Омурбек Бабанов, шунингдек, мухолифат парламент фракцияси етакчиси Бакит Торобаевнинг исмларини кўриш мумкин.
Қирғизистонда 2011 йилда бўлиб ўтган президентлик сайловларида Марказий сайлов комиссиясига 80 нафардан ортиқ одам ўз номзодини илгари сурган, бироқ уларнинг бешдан биригина рўйхатдан ўтган.
Қирғизистон президентилигига сайлов жараёни жорий йилнинг 15 октябрида бўлиб ўтади. Амалдаги президент Алмазбек Атамбаев сайловда иштирок этмайди, чунки мамлакат қонунчилиги олти йиллик муддатга бир мартадан ортиқ сайланишга рухсат бермайди.
Изоҳ (0)